Shillong, Jylliew 06
Ka Hynñiewtrep Integra-ted Territorial Organisa-tion (HITO) Sengkmie ha ka janmiet jong ka 6 tarik u Jylliew 2024 ka la leit ban ai jingkyrshan ïa ka Kong Bindas Syiem kaba la sdang ïa ka jingshong shah thngan kaba khlem buh por hakhmat ka jaka pynïeng kali kaba don ha Additional Secretariat kum shibynta ban dawa na ka sorkar jylla ban maramot bad pynbha ïa ka surok na Nongpoh-Umden-Sonapur kaba la sniew bad jot rathai mynta la kumba 15 snem eiei.
Haba kren sha ki lad pathai khubor, na ka liang u President ka HITO, u Bah Donbok Dkhar, u la ong ba kum ka seng ka ai ïa ka jingkyrshan kaba radbah ïa kane ka longkmie kaba la mih shakhmat ban dawa ïa la ka hok kum ka ‘riew paidbah jong ka jylla.
Haba jubab halor ka jingtlot bad jingduna jong ka sorkar ha kaba ïadei bad ka risol MP ilekshon kaba dang shu mih ha ka 4 u tarik u Jylliew 2024 hadien ba shah rem kput ha ki kyrtong jong kiwei pat ki seng saiñ pyrthei bad la sakhi ruh ba ki nongïalam ba hakhmat jong ka NPP bad ruh ka sorkar ki la ong ba kin sa khmih bniah ïa ki jingduna halor ka jingrem kput jong ki ha kane ka ilekshon, hynrei na ka liang u Bah Donbok u la pynphai nia da kaba ong ba kane ka longkmie kaba la mih na la shnong ban wan shong shah thngan hakhmat ka Additional Secretariat ka la pyni lypa ïa ki jingduna banyngkong eh jong ka sorkar.
“Ngim donkam shuh ban pyni ïa ki nuksa balei phi bakla hynrei ka jingbakla phi la ïohi hi ba kane ka dei ka jingbakla kaba nyngkong ba phim pynbiang ïa ki lynti ki syngkien bad dei halor kata ka nongrim ba ki paidbah kim sngewmon bad kim shaniah shuh ïa phi”, la ong u Bah Donbok.
Shuh shuh u Bah Donbok u la ong ba kum ka sorkar kam donkam shuh ban wad ïa ki daw tynrai kiba la pynlong ïa ka NPP ba kan leh sniew ha kane ka ilekshon MP, hynrei ki daw tynrai ki la paw tyngkreiñ shabar. Kane ka jingwan shong shah thngan jong katei ka longkmie ka la long shwa tang ka nuksa kaba rit bad lehse, ha ki sngi ki ban sa wan kin sa mih kiba kham jur shuh shuh ban ïa kane.
Namar kata, u la dawa ruh ba ka sorkar khamtam u Myntri ba dei khmih ba u dei ban pynsted ban pynbha mardor ïa katei ka surok ha Nongpoh Umden sha Sonapur ïoh ba ka ding kan dang ïai klang namar katei ka surok ka dei ka surok kaba la jot rathai la kumba 15 snem eiei.
“Ngi kyntu ïa ka sorkar hapoh ka jingïalam u Conrad K. Sangma ba un shim ïa kane ka sienjam kaba long kyrpang, kano-kano ka mat kaba dawa ki nongthep ‘vote’ phi dei ban pynbiang lym kumta ïoh ki wan shong ha khyrdop ïing jong phi bad wan pynjrong ïa kane ïoh ka ding kan dang klang shuh-shuh”, la ong u Bah Donbok.
