Jowai, Jylliew 06
Ka Khasi Students’ Union (KSU) West Jaiñtia Hills District Unit ha ka 6 tarik Jylliew ka la dawa na u Deputy Commissioner, West Jaiñtia Hills District ban tuklar halor ka jingjia shah pynïap u rangbah ha khappud Assam Meghalaya ha ka shnong Lapangap.
Kum ban shu pynkynmaw, kane ka jingjia shah pynïap une u rangbah ba ithuh kum u Tellme Talang (31 snem) ka la jia ha ka 29 tarik Jymmang bad la lap ïa ka met ïap kaba thiah lyngktar ha jaka rep ha ka sngi kaba bud.
Ka KSU hapoh ka jingïalam u Vice President samla Chanbor War bad General Secretary u Leningrad Tariang bad kiwei kiwei ki dkhot nongkitkam ki la leit ïakynduh ïa u Deputy Commissioner ka West Jaiñtia Hills District ban kyntu ïa u ban pynïoh jingïarap sha ki khun ki kti jong une u lanot (L) Tellme Phawa uba shah pynïap dusmon ha ki briew bym ithuh ha ka 29/05/2024 ha jaka rep lyngkha jong u hajan khappud Assam.
Ka KSU ka la ong ba na ka liang u DC u la kular ban shimkhia na ka bynta ban ai jingïarap sha ka ïing une u lanot, bad u DC u la kular ruh ban bthah ïa ki ophisar ban shimkhia ban pynlong ïa ka jingtohkit ban pynïoh ïa ka jingbishar hok ïa une u rangbah.
Ka seng ka la dawa ruh na u DC ban pynsted ïa ka jingtohkit bad kem mardor ïa kiba donkti ban pynïap ïa u (L) Tellme Talang.
