Shillong, Jylliew:
Ka jingshah rem kput u kyrtong ka Congress, Bah Vincent H Pala ha kane ka ilekshon MP Lok Sabha na Shillong Parliamentary Constituency ka la pynlong ïa u MLA ka Congress na Nongstoiñ u Bah Gabriel Wahlang ban ong ba dei ban pynkhlaiñ biang ïa ka Congress ha Shillong Constituency bad donkam ban sngap ruh ïa ka jingai jingmut ki nongtrei ym ban shim rai na Delhi.
U Bah Gabriel u la ong ba mynshwa ka la don ka jingai jingmut ban sngap ïa ki nongtrei lada thung ïa u President ka Meghalaya Pradesh Congress Committee (MPCC), hynrei ka All India Congress Committee (AICC) ka la rai na Delhi ban thung ïa u Bah Vincent Pala kum u President bathymmai.
Namar kata, u don jingkyrmen ba ka Congress kan dang khlaiñ nangne shakhmat namar donkam ïa ki kyrtong bad ïa u nongïalam uba ïohi jngai uba sngap ïa ki nongkitkam jong ka Congress.
