Nongpoh, Jylliew:
Ka Hynñiewtrep Achik National Movement (HANM) Ri Bhoi District kum shi bynta ban rakhe ïa ka sngi kyrpang ban pynneh pynsah ïa ka mei mariang ha ka pyrthei baroh kawei lane kata ka World Environment Day, ha ka Sngi Balang ka la leit ban thung da ki tynrai dieng ha shi lynter jong ka surok bah National Highway 6 ha Byrnihat, ka jaka kaba la ïoh ïa ka kyrdan ba nyngkong ha ka ri India halor ka jingjaboh jong ka lyer.
U President ka HANM Ri Bhoi, u Bah Donroi Kshiar haba kren ha kane ka sngi u la ong ba ka jingpynlong jong ka seng ban thung dieng kum shibynta ban ai nuksa sha ki paidbah halor ka jingdonkam ban pynneh pynsah ïa ka mariang bad wanrah biang ïa ka lyer kaba khuid kumba kane ka jaka ka dei kaba la ïoh ïa ka nam kaba nyngkong ha ka jingjaboh jong lyer hapoh ka ri hi baroh kawei.
