Shillong, Jylliew 06
U MLA ka Congress na Gambegre konstitwensi u Saleng A Sangma un sa iehnoh na ka jinglong MLA ha ka taïew ban wan hadien ba u la shahjied kum u MP ka Tura parliamentary konstitwensi ha ka ilekshon sha Ïingdorbar Thawaiñ Lok Sabha jong ka ri.
La ïathuh ba u Saleng u la pynkhreh phah ïa ka shithi iehnoh kam kum u dkhot ka Ïingdorbar Thawaiñ ka Jylla na Gambegre konstitwensi ha ka taïew ban wan hadien ba u la shahjied kum u dkhot ka Ïingdorbar Thawaiñ Lok Sabha na Tura hadien ka jingñiew ‘vote’ kaba la long ha ka 4 tarik mynta u Jylliew.
U Saleng u la don ha Parliament House mynta ban pynbit pynbiang ïa ki jingdonkam ha shwa ba un shim ïa ka jingsmai kum u MP ka Tura parliamentary konstitwensi.
Ka Assembly Secretariat ha kane ka Jylla ruh ka la ïathuh ba haduh mynta, u Saleng um pat ai jingtip lano un aiti ïa ka shiti iehnoh kam kum u MLA ka Gambegre.
U Saleng un hap ban iehnoh na ka jinglong MLA hadien ba u la shahjied kum u MP namarba ka aiñ kam shah ban long lang u dkhot jong ka Ïingdorbar Thawaiñ ka Jylla bad u dkhot ka Ïingdorbar Thawaiñ Parliament.
U Saleng u dei u MLA ka Congress uba don tang marwei na Rilum Garo namar na ki 24 tylli ki konstitwensi ha Rilum Garo, ka NPP ka don 16 ngut ki MLA hynrei kam shym la lah ban jop. Hynrei u Saleng kum u MLA bad marwei ka Congress ha Rilum Garo u la lah ban jop na Tura konstitwensi.
Ka jingjop u Saleng na Tura konstitwensi ka la pynshaïong ïa ki MLA ka NPP kaba kham bun paid hynrei u jop u MLA uba don tang marwei kum u nongïalam.
Lada u Saleng u iehnoh kam kum u MLA ka Gambegre, ka BJP bad Trinamool Congress kin nym ailad hynrei ka aiñ ka shah ban bat tang kawei ka kyrdan.
U Saleng u la ïoh ka jingjop kaba pynkyndit ïa kiba bun namar u la lah ban pynliem ïa ka longïing jong u Purno Agitok Sangma hadien bun phew snem.
Ynda u Saleng u iehnoh kum u MLA, ka ilekshon shiteng samoi ka hap ban don na ka bynta ban jied ïa u MLA bathymmai na Gambegre konstitwensi.
