Shillong, Jylliew 06
U MP ka seng Congress na Assam, u Gaurav Gogoi, ha ka Sngi Palei u la mih shakhmat ban pynrem jur ïa u Myntri Rangbah ka Assam bad nongïalam ka BJP, u Himanta Biswa Sarma, hadien ba u la kynnoh ba kawei ka niam ka la ïaleh pyrshah ïa ka kynhun National Democratic Alliance (NDA) kaba la ïalam sha ka jingshah rem jong ki kyrtong ka NDA ha Meghalaya, Nagaland bad Manipur.
“Nga pynrem ïa ka jingkren laplah bad khem jingkitkhlieh jong u Myntri Rangbah ka Assam, u Himanta Biswa Sarma. Um don satia ka jingmut kaba ïar ban pdiang ïa ka jingkitkhlieh halor ka jingshah rem jong ka NDA ha Nagaland, Meghalaya bad Manipur. Nga kyntu ruh ïa ki Myntri Rangbah jong kine ki jylla (Nagaland, Meghalaya bad Manipur) ba kin wan shakhmat ban pynrem ïa kane ka jingkynthoh jong u Himanta. Ngi dei ban ïatreilang ban pynneh ïa ka jinglong kyrpang jong ka Northeast,” la ong u Gaurav, uba la shah jied kum u MP na Jorhat, haba kynthoh ha rynsan ‘X’.
Lah ban kdew ba hadien ba la dep ka jingñiew ‘vote’ na ka bynta ka ilekshon MP Lok Sabha, u Himanta, haba kren sha ki lad pathai khubor ha Assam, u la kynnoh ba ka la don kawei ka niam kaba khlem kyrshan satia ïa ka NDA ha Nagaland, Meghalaya bad Manipur.
“Ha Meghalaya, Nagaland bad Manipur, ka la don kawei ka niam kaba la ïaleh pyrshah ïa ka NDA. Bad kane ka la wanrah ïa ka jingkylla na ka daw ba kata ka niam ka don bun ngut ki nongbud ha kine ki jylla. Kam dei satia ka jingshah rem saiñpyrthei. Ym don ba lah ban ïakhun pyrshah ïa kano-kano ka niam,” u la kynthoh.
Nalorkata, u la ong, “Ha ka jingshisha, kata ka niam kam ju tuklar ha ki kam saiñpyrthei, hynrei ha kane ka sien ki la ïadon bynta wat ha Assam ruh. Ki la trei pyrshah ïa ka NDA ha kane ka kynti.”
Lah ban kdew ba ka Congress ka la jop ha ki artylli ki konstitwensi ha Manipur bad kawei ka konstitwensi ha Nagaland bad kawei ha Meghalaya. Ha Shillong Parliamentary Constituency, ka Voice of the People Party (VPP) ka la jop.
Ha Meghalaya, ka BJP ka khlem pynïeng kyrtong bad ka la kyrshan ïa ki kyrtong jong ka National People’s Party (NPP).
Ha Nagaland, ka BJP ka la kyrshan ïa u kyrtong ba la pynïeng da ka NDPP. Ha Manipur, ka BJP ka la pynïeng kyrtong na Inner Manipur konstitwensi katba ha Outer Manipur konstitwensi, ka la kyrshan ïa u kyrtong ka Naga People’s Front (NPF). Hynrei kine ki kyrtong BJP bad NDA ki la shah rem lut.
