Shillong, Jylliew:
U Working President ka UDP, Bah Paul Lyngdoh uba long ruh u Myntri ha ka Sorkar MDA-II, u la buh jingkylli ba hangno don kata ka jingbamsap bad ha kano ka kyrdan ka don.
Kane ka jingbuh jingkylli u Bah Paul ka la long haba kylli halor ka jingkynnoh ka VPP kaba la pynpaw ruh ba kan kyntu ïa ka Sorkar Kmie ban phah ïa ka ED bad CBI ban tohkit halor ki kam bamsap hapoh ka jylla.
U Bah Paul u la ong, kane ka dei ka Sorkar MDA-II, kaei kaba la bakla ne leh bakla ha ka samoi treikam kaba la dep jong ka MDA-I, la pynïasoh lang ruh bad ka MDA-2, kumba ka paw mynta.
U Myntri u la ong, kane ka Sorkar ka dei kaba thymmai ha kaba la ïatreilang da ki seng saiñ pyrthei bapher bapher. “Hooid ha ka por ba sdang, ngi la pyrshang ban thaw ïa ka sorkar ban ïalam da ki seng riewlum hynrei kane kam shym la urlong satia bad kumta ym banse ban phai khmat sha ka NPP, kaba la ïoh ka jingkyrshan radbah na ki paid ka rilum Garo.
Halor ka jingpynpaw jong u President ka VPP u Bah Ardent M Basaiawmoit ba ki nongïalam ka sorkar MDA ki dei ban hiar shuki noh hadien ka jingshah rem kput ha ka ilekshon MP, u Bah Paul u la ong, hadien ba ki la ïoh ka jingjop kaba heh, ki don ka hok ban ong, hynrei hato man la ka ilekshon hap ban bujli sorkar seh.
U Bah Paul u la ong, “Lada shu ïa ong noh ba ngin mih noh na ka Sorkar, naba ngi la shah rem te mano pat ban bujli ïa ka MDA? Kaei ka ban jia ïa ka synshar khadar ha Meghalaya bad mano ban shimti? Hato kaei pat kawei ka lynti? la buh jingkylli u Bah Paul. Ïa ngi la jied da u paidbah na ka bynta san snem, bad ka Lok Sabha ilekshon ka long kaba pher bad ka rukom thep vote ruh ka pher. Te kan jia aïu shu buh lada ngi jop ha ka ilekshon District Council, hato ngin wan phai biang sha ka bor lada ngi mih noh mynta?”
U Bah Paul u la ong, ka long kaba suk ïano-ïano ruh ki bym don ha ka bor ban buh lut baroh ki jingkynnoh ha ka sorkar hynrei ai pat ba ha ka VPP kaba la jop ïa ka ilekshon MP ba kin rah ïa ki mat ka jylla, bad kam dei ban don ka jingïaleh hapdeng ka jong ki.
