Shillong, Jylliew 06
Ha ka Sngi Palei kawei ka longkmie na Ri-Bhoi District ka la wan mih kyndit-kynsan hakhmat ka khyrdop Secretariat ban shong thngan bad byrngem ruh ban shong shah jingit ha ban da ïap.
Kane ka jingwan shong shah thngan jong katei ka longkmie kaba la tip kyrteng kum ka Kong Bindas Syiem kaba dei na ka thaiñ Umden ka long halor ka jingbym shimkhia jong ka Sorkar ban shna pynbha noh ïa ka surok Nongpoh-Umden-Sonapur.
La ïohi ba kane ka longkmie kaba la wan ïeng hakhmat ka khyrdop ka Secretariat, ka la rah lang ryngkat bad ka placard, ha kaba la don ka jingthoh kaba ong, “Nga ka Bindas Syiem nga wan ban dawa ïa ka hok u paidbah na ka bynta ka surok Nongpoh-Umden-Sonapur katba ka Sorkar kam pat ai ngan shong shah thngan ha ban da ïap hakhmat ka Secretariat”.
Hynrei tang hadien 15 ne 20 minit eiei ba la ka don hakhmat ka khyrdop jong ka Secretariat, la wan noh ki pulit ban pynkynriah noh na katei ka jaka ban leit phah shong pat ha jaka ïeng kali kaba don hajan jong ka Additional Secretariat.
La ïohi ruh ba na ka liang ki majistor bad ki pulit ki la kyntu ïa kane ka longkmie ba kan pynsangeh noh ïa ka jingshah thngan ha kane ka jaka naba ym shym la ai jingbit satia da ki bor district. Nangta ka la don ruh ka jingïapyni nia hapdeng ka Kong Bindas bad ki majistor bad pulit, ha kaba na ka liang kane longkmie ka la pyneh triang ba kan nym leit phai satia sha la ïing katba ym pat lah ban pynbha ïa katei ka surok.
Ka Kong Bindas ka la pynpaw ruh ba kam don jingtieng satia eiei ruh wat la na ka liang ki pulit kin pynngat ha ki kyndon aiñ bapher bapher ne ban shah set patok ruh bad kan bteng beit ïa ka jingshah thngan ha kino-kino ki jaka ruh.
Lah ban pynkynmaw ba ki nongshong shnong ka thaiñ Umden, kynthup ki seng bapher bapher bad ki Synjuk ki Rangbah Shnong ki la ju dawa na ka por sha ka por na ka Sorkar Jylla ban shna pynbha noh ïa ka surok Nongpoh-Umden-Sonapur kaba la sniew bad jot rathai bad kaba la buh jingeh shikatdei eh ïa ka ïaid ka ïeng.
Ka Kong Bindas Syiem kaba don lai ngut ki khun, ka la pynpaw ba ka la shim ïa kane ka rai ban wan shong shah thngan ka dei halor ba ka la ngiah bad kdang ïa ki jingkular thok ha ka por ilekshon.
“Kito kiba jop bad ba rem ha ka ilekshon ki la kular ban peit bad shimkhia ïa kane ka surok hynrei ka paw pynban ba ka dei tang ka kam thok. Namar kata, nga la ngiah khamtam nga shimet ruh nga la mad ïa shibun ki jingeh namar ka jinglong jong kane ka surok,” la ong ka Kong Bindas.
Ka la pyntip ruh ba halor kane ka kam ka la dep ban ïakynduh ïa u Executive Engineer ka PWD (Roads) bad dep thoh ruh sha u Deputy Commissioner hynrei kam shym la ïoh satia ïa ka jubab ka ban pynhun.
Ka Kong Bindas ka la ong ba katba ka Sorkar kam pat ai ne pynbha ïa ka surok, kan nym leit phai ïing satia hynrei ban ïaid beit shakhmat bad ka jingshong shah thngan.
Ka Kong Bindas ka la pynpaw ruh ba wat la kin ong ba ka dei ka nongpynkheiñ aiñ ruh kan nym sngew eiei satia namar ba kane ka mat kaba la shim kam dei ka mat na ka bynta ka ïing ka sem jong ka shimet hynrei ka shim na ka bynta jong u paidbah.
“Lada ki pynngat ïa nga ha kino-kino ki kyndon, lada kin set ïa nga ha patok, nga kloi ban leit sha patok bad ha patok ruh ngan shong shah thngan, bad kane ka dei ka rai kaba nga la shim bad shisien ba nga la rai ngan leh beit kumta kumba nga la rai,” la ong ka Kong Bindas.
