Shillong, Jylliew:
U Bah Robertjune Kharjahrin uba dei u kyrtong ka Regional Democratic Alliance (RDA) ha ka ilekshon MP sha Lok Sabha bad uba la shah rem noh, u la ong ba ka jingpynkha bad jingpynmih thymmai ïa kino-kino ki seng saiñpyrthei, ka jingthmu jong ki ka long ban bujli noh ïa ki seng kiba la slem.
Haba ai jingkren sha ki lad pathai khubor ha ka Sngi Balang ha ka ïingsah jong u, u Bah Kharjahrin u la ong ba lada dei ba ka Voice of the People Party (VPP) kam kwah ban mih bujli ïa kiwei-kiwei ki seng kan nym mih pyrthei satia. Ka jingmih jong kane ka seng thymmai ka dei ka jingkwah bujli noh bad kane kam shong eh ha ki nongïalam, hynrei ka shong ha ka rai jong ki paidbah nongshnong shnong ba ki lah ne em ban bujli ha ka jaka jong ki seng kiba rim.
“Ka jingdon jong ka seng thymmai hi ka dei ban bujli ïa kiba rim, la ki lah ne em ïa kata hynrei kam shong eh ha u Bah Ardent hynrei ka shong ha ki paidbah nongshong shnong. U Bah Ardent un trei shitom hi kumba u la trei bad na ka liang ka VPP ruh kin trei shitom hi ba kin pynkiew ïa ka seng lajong”, la bynrap u Bah Kharjahrin.
U Bah Kharjahrin u la ong ba kumba ka long ha kane ka ilekshon MP kaba dang shu dep la ïohi ba ki paidbah ki kham jied bad kham peit bha ïa ki seng, hynrei na ka liang ki kyrtong kiba la ïakhun ïa ka ilekshon ruh ki la noh synñiang kat kaba ki lah.
U Bah Khajahrin u la ong ba ka jingjop u Dr. Ricky AJ Syngkon kum u MP ka Shillong Parliamentary Constituency ka dei ba ki paidbah ki jied ïa ka seng. Kawei ka daw halor kane ka dei ruh ba u Dr. Syngkon u la sdang kham kloi ban pynkhreh ïa ka ilekshon bad u la lah ban poi lut sha man baroh ki konstitwensi hynrei na ka liang jong u pat, um shym la lah satia ban pyndep lut ban leit sha baroh ki konstitwensi.
“Ngam shim ba kan dei tang ka jingjied briew hynrei bun ki kham jied ïa ka seng, ngin nym lah ban len ïa kata”, la bynrap u Bah Kharjahrin.
