Shillong, Jylliew 06
U nongaibuit barim jong ka United Democratic Party (UDP) bad uba dei ruh u MDC shu sieh da ka sorkar jylla ha KHADC, Bah Bindo M Lanong, u la ong ba ka jinghiar ka UDP ha kane ka ilekshon MP Lok Sabha ka dei namar ka ai tiket ïa u Bah Robertjune Kharjahrin kaba ki paidbah kim pat ithuh.
U la ong namar ki paidbah kim ithuh namar um pat ïakhun MDC, MLA dei na kane ka daw ka jingïoh ‘vote’ ka la hiar bha, hynrei u Dr Ricky AJ Syngkon u dei u nonghikai ha NEHU bad u la ïakhun teng ïa ka ilekshon MLA na Umsning konstiwensi.
U la ong ki nongïalam ka UDP kin hap ban kitkhlieh ïa ka jingrem ka seng ha kane ka ilekshon.
Shuh shuh u la pynkynmaw ba hadien ba u la rem ïa ka ilekshon MLA na Nongkrem konstitwensi u la pan tiket ban ïakhun ïa ka ilekshon MP Lok Sabha hynrei kim shym la jubab.
