Shillong, Jylliew 06
U MLA ka Congress na Mawhati u Bah Charles Marngar u la ong ba ka jingjop bad jingkiew sted jong ka Voice of the People Party (VPP) ka dei namar ki paidbah ki la kwah jingkylla bad ruh ba kane ka seng kam pat don daw ne ki dak thohbria.
U Bah Charles uba long ruh uwei na ki nongïalam ka Congress u la ong, shisien ba kum ki seng saiñ pyrthei ne ki nongmihkhmat haba ki la rim bad jop bunsien, kin don beit ki daw pyrshah ïa ki, wat la ki la trei bha katno katno ruh.
U la ong ba ka jingshah rem jong u Bah Vincent H Pala ruh ka dei ka rukom namar ba shisien ba la jop bun snem, ki don ki daw wat la pyrshang ban leh ban trei katno-katno ruh.
Une u MLA ka Congress u la ong, ka Voice of the People Party (VPP) ka dei kaba dang thymmai bad kaba la kiew sted bad kane ka dei namar kam pat don kano kano ka daw ne ki dak thohbria, bad ha kaba ki jingkular ruh ki bun. Kumta lehse u paidbah ha kane ka juk mynta, u don ka jingpyrkhat da kumwei ba ka VPP kan lah ban leh bad ki paidbah ki kwah ban pyrshang ban jied ïa ka namar ba ka dei kaba thymmai.
U la ong ruh ba ym tang katne hynrei la lap ba namar ka jingkwah bad thrang ïa ka jingkylla, ka la pynlong ruh ïa u paidbah haduh ba un sei hi na lade ka pisa na ka bynta ka bai kali, bai sha bai dud.
Hynrei ha kajuh ka por, u la ong ba ha ka politik kan don ka jingkylla, bad kano kano ka seng kaba jop, hap ban ailad ba kan synshar bad u paidbah un sa bishar.
U Bah Charles u la ong ba wat la ka Congress ka la shah rem hynrei kumba ka long mynta, ki paidbah ki dang ieid ïa ka Congress bad dang shaniah ha ka. “Hooid, ngim shym la jop ha Shillong hynrei kam shym la don ka jingktah ne jingduhnong pat namar ngi la ïoh ka jingjop ha Tura, kaba long kumba ngi shu kylliang jaka. Namar baroh shi katta ngi jop ha Shillong bad rem ha Tura hynrei mynta ngi rem ha Shillong bad jop ha Tura,” u la ong.
