Jowai, Jylliew 06
U Myntri Rangbah ka jylla u Conrad K Sangma u la ai ka jingkular ban siew noh ïa ka tulop jong ki nongtrei ka Jaiñtia Hills Autonomous District Council (JHADC) shwa jong ka lehniam Behdeinkhlam.
Ïa kane u Myntri Rangbah u la pynpaw hakhmat jong ki nongïalam ka District Executive Committee jong ka National People’s Party (NPP) West Jaiñtia Hills, kiba la leit ban ïakynduh ïa u ha ka Sngi Palei ban ïakren halor ki kam ba sahteng hapoh ka West Jaiñtia Hills.
Ha kane ka jingleit ïakynduh, la ïalam khmat da u MLA ka Jowai Bah Wailadmiki Shylla, u CEM ka JHADC Bah Thombor Shiwat, u President District Bah Octomewot Lamin lem bad ki nongtreikam jong ka seng.
Ki kam kiba sahteng ki long ka jingpyntrei ïa ka Iawmusiang Market Complex kaba la sahteng da ki phew phew snem, ban pyllait noh ïa ka tulop ki nongtrei ka JHADC bad ka bhah pisa jong ka Council ka ban pynsuk ïa ka Council ha ka ban siew tulop man la u bnai, khnang ba kan nym don ka jingthut ha ka rukom siew tulop.
Ki dkhot ka Committee ki la ïoh lad ban ïathir jingmut sani bha halor kitei ki kam kiba hakhmat eh na ka bynta ka jingmyntoi ki paidbah nongshong shnong ka West Jaiñtia Hills.
Ha kaba ïadei bad ka Iawmusiang Market Complex, na ka liang u Myntri Rangbah u la kular ban mang pisa noh hapoh kine ki khyndiat sngi ban wan.
Ha kaba ïadei bad ka jingduh tulop jong ki nongtrei ka JHADC kaba la kynjoh da ki phew phew bnai bad ka lah ruh ban kot sha ka shisnem duna, na ka liang ki dkhot ka Committee ka NPP ki la kyntu ïa u Myntri Rangbah ban pynbeit kloi noh ïa kane ka jingeh jong ka Council.
Ki dkhot ka Committee NPP ha ka jingïakren bad u Myntri Rangbah ki la pyntip ba u la kular ban pyllait noh ïa ka tulop jong ka Council shwa ka lehñiam Behdeinkhlam mynta u snem, khnang ba ki nongtrei ka Council kin ïoh ban pyndap pynbiang ïa ki jingdonkam ha kiba bun ki liang.
