Shillong, Jylliew 06
Ka shnong Nongsder kaba hap ha Umroi konstitwensi, Ri Bhoi district kaba dei ka shnong kaba u kyrtong ka NPP u khlaiñ bha ka jingïoh ‘vote’, hynrei ha ka ilekshon MP ba dang shu dep u kyrtong ka VPP u Dr. Ricky AJ Syngkon bad ba shong ba sah ha Nongsder u la pynlyngngoh ngaiñ ïa ki ar ngut ki nongmihkhmat ka NPP ha katei ka konstiwensi namar u la tam ïa ka Kong Ampareen Lyngdoh da 200 ‘vote’.
Ka 4 tarik Jylliew kaba dei ka sngi ñiew’vote’ ka la pynkyndit hi thret ïa kitei ar ngut ki nongmihkhmat ka NPP na Umroi konstiwensi kata ïa u MLA ba mynta u Bah Damanbait Lamare bad u Bah Rangkynsai Kharbuki uba dei u MDC namar u kyrtong ka VPP u Dr. Ricky AJ Syngkon u la ïoh 16497 ‘vote’ katba ka Kong Ampareen Lyngdoh kum kyrtong ka NPP ka la ïoh tang 3783 ‘vote’.
Katba ha Nongsder ka shnong ba sah u Dr. Ricky Syngkon, u la ïoh 600 ‘vote’ bad ka NPP ka la ïoh 400 ‘vote’.
Haba ïakren bad u Rangbah Shnong Nongsder, Bah Jonas Lyndem u la pynpaw ka jingsngewkmen haba ka shnong ka la sei da u MP ka Lok Sabha kaba la pynsah jingkynmaw ïa ka shnong bad ïa ka Ri-Bhoi baroh kawei namar u la jop bun ïa ki kyrtong kiba ïakhun pyrshah.
U la ïathuh ba ha kane ka ilekshon MP ka la pynkyndit ïa ki paidbah ka shnong Nongsder namar ka dei ka shnong kaba ju khlaiñ ka NPP hynrei mynta ki paidbah ki la pyntam ïa u kyrtong ka VPP uba dei u trai shnong.
U la ong ba ka VPP ka la pynkyndit ruh wat ïa ka Umroi konstitwensi namar u Dr. Ricky u la ïoh haduh 16497 ‘vote’ bad ka NPP ka ïoh tang 3783 ‘vote’.
Nalor kane, u la ong ba ka jingjop donburom u kyrtong ka VPP ha ka ilekshon MP ka la long kumba jyrwait shkor ïa ki nongmihkhmat kiba mynta ba kin trei bha ïa ki paidbah hapoh ka jylla.
Shuh shuh u la pyntip ba ki nongkitkam shnong bad ki seng longkmie ki la leit ban ai khublei ïa u Dr. Ricky ha katei ka sngi ñiew’vote’ hadien ba u la wan poi sha shnong.
U la ïathuh ba naduh ba u kynmaw ka shnong kam pat ju ïoh ïa ka MP Lok Sabha skhim hynrei tang ka MP Rajya Sabha bad u don jingkyrmen ba ka shnong kan sa ïohi ïa ka MP skhim haba la jop u briew napoh ka shnong.
