Shillong, Jylliew 06
U kpa uba kit ba bah ïa ka ïing ka sem, u la pynpaw ba ma u bad ka kmie ki kwah palat ban pynsngewbha ïa ka Syrpailin Wahlang kaba dei ka khun kaba hynñiew na ki phra ngut shipara, hynrei kim sngewthuh namar kam lait kren naduh dang kha.
Haba ïakren bad u Bah Stainhing Nongsiej (kpa ka Syrpailin) uba dei shnong na Nongstoiñ, u la ïathuh ba u la sdang ban lap ba ka Syrpailin Wahlang kam lait ban kren ynda la poi ha ki 9 bnai namar ka shu ïam bad rkhie tangba kam lait kren namar kam ïohsngew kumba long lem kiwei ki khyllung.
U la ïathuh ba ka Syrpailin ka lait tang ban khot ‘Pa’ lait nangta kam lah ban kren hynrei kam ju thlia pat naduh dangrit.
U la ïathuh biang hadien ba la dep test ha Laitumkhrah sa tip ba kane ka khun kam ïohsngew haduh 100 percent.
“Haba ka la sdang heh ka don ka jingeh hynrei ngi kren la ka kren ban pyni da ka kti hynrei haduh ban da wan phah skul sha Ferrando Speech and Hearing Centre kaba don ha Umniuh Khwan, Umsning Block, Ribhoi District ka jynjar ban ïa pyni da ki kti namar ki la hikai da kawei ka rukom” u la ong.
Nangta, u la ïathuh haba la phah skul sha shnong ka la nang ban thoh kyrteng lajong bad kyrteng kmie bad kpa, hynrei namar la kwah ban phah skul kiba biang la phah sha kane ka skul haba la kynjoh sha ka 8 snem.
“Ngi sngewkyndit ban ïoh ïa ka khubor ba ka khun ka ïoh bun mak bha ha ka jingkheiñ hynrei ngim lah ban phah sha ki kyrdan ba heh namar ba ban ka jingduk” u la ong.
U kpa u la ai khublei ïa kiba pynïaid ïa kane ka skul kaba la hikai bha ban wan shaduh shakhmat ha ka eksam matrik mynta u snem.
Kum ban pynkynmaw, wat la ka Syrpailin Wahlang kam shym la lait kren naduh ba wan longbriew sha sla pyrthei, hynrei kaba la pynkyndit lut ïa baroh ki para khynnah skul bad ïa ki nonghikai jong ka Ferrando Speech and Hearing Centre kaba don ha Umniuh Khwan, Umsning Block, Ribhoi District ka dei namar kane ka khynnah ka la ïoh heh mak ha ka sobjek jingkheiñ haduh 84 mark bad wan kyrdan ba ar ha ka eksamin Secondary School Leaving Certificate 2024 ba la pynïaid da ka Meghalaya Board of School Education.
