Nongstoiñ, Jylliew:
Ka Voice of the People Party (VPP) ka la sar lut na baroh lai tylli ki Constituency ha West Khasi Hills District ba kynthup ha Nongstoiñ Assembly Constituency, Mawshynrut Constituency bad Rambrai-Jyrngam Assembly Constituency.
Katkum ka jingkheiñ na ki kor EVM, ka Congress ka la wan ba ar bad ka NPP pat ka la wan ba-lai. Katkum ki ‘vote’ ba kine ki seng lyngba ki kyrtong ki ïoh ka long, ka VPP ka la ïoh haduh 21984 ‘vote’ na Nongstoiñ da kaba tam haduh 15503 ïa ka Congress kaba don ïa u MLA ba mynta Bah Gabriel Wahlang kaba la ïoh tang 6481, bad ka NPP pat ka ïoh tang 4895.
Nangta, ka Mawshynrut Assembly Constituency ka VPP ka la ïoh 11769 da kaba tam haduh 2330 ‘vote’ ïa ka Congress kaba la ïoh 9439 bad ka NPP pat ka la ïoh 6293, katba ha Rambrai Jyrngam, ka VPP ka la ïoh 12295 bad ka la tam tang 1092 ‘vote’ ïa ka Congress kaba la ïoh haduh 11203 bad ka NPP pat ka la ïoh tang 4539 ‘vote’.
Ha kane ka sngi hadien ka jingdep ban ñiew ïa ki ‘vote’ na ki lai tylli ki constituency na WKH, ki paidbah nongkyrshan ka VPP ki la ïamih ban ïashad kmen kum ka dak ban lehkmen ïa ka jingjop u kyrtong ka seng na ki lai tylli ki Constituency bad ki la pynlong ruh ïa ka jingïalang ai khublei hajan NRL Petrol Pump Nongstoiñ.
Haba ïakren bad u Bah Bormanding Nonglang, President ka West Khasi Hills District Congress Committee ha ryngkat ka jingdonlang ki nongkitkam na ka Rambrai Jyrngam Congress Committee bad na ka Mawshynrut Block Congress Committee hadien ka jingshah rem noh u Bah Vincent H Pala, u la ong, “Ngi don hi ka jingsngew, hynrei ngi hap ban don ka jingïakmenlang ryngkat bad ka sur u paidbah.”
“Ngi don hi ka jingsngew, hynrei ngi hap ban don ka jingïakmenlang ryngkat bad ka sur u paidbah bad na ka bynta ka sur u paidbah lada ngi sngew kumno-kumno ruh ngi hap hi ban pdiang beit ïa kaei kaba u paidbah u la dep ban rai,” la ong u Bah Bormanding.
U la ong ruh ba ha ka jingïohi ka jong u, kum ki nongkitkam ki la ïatrei shitom ban ïatur ban ïaksaid na ka bynta ban pynsngewthuh ïa ki mat hynrei ka sur jong u paidbah ka la beh sha u prah naduh ba sdang, kumta yn ong kumno hynrei yn hap ban pdiang beit ïa kaei kaba u paidbah u rai.
Shuh shuh u la kyntu ïa ki paidbah nongkyrshan ka Congress kiba la ai ka jingkyrshan ïa u kyrtong ha kane ka ilekshon MP bad ong ba nangne shakhmat kin sa khot ïa ka jingïalang bishar bniah jong ka District bad kiei ki lad ki lynti na ka liang ka Congress kan shim ban nang pynkhlaiñ shuh ïa ka seng khamtam ban pynkhreh ïa ka ilekshon MDC.
Kumjuh ruh haba phai sha ar tylli ki Constituency ha South West Khasi Hills, ka Voice of the People Party (VPP) ka la ïoh ïa ka jingjop donburom kata ban tam kput ïa kiwei ki kyrtong khamtam lei ba ki dei ki constituency ba la mihkhmat da ka UDP.
Ha ka jingkheiñ ïa ki ‘vote’ ha Mawkyrwat Constituency, ka VPP ka la ïoh haduh 20210 ‘vote’ na ki 30346 ki nongthep ‘vote’ katba kaba wan ba ar ka dei ka Congress kaba la ïoh tang 3962 ‘vote’.
Katba ha Ranikor Constituency ka VPP ka la ïoh 10674 ‘vote’ na ki 29873 tylli ki ‘vote’ bad kaba wan ba ar ka dei ka UDP kaba la ïoh 6523 ‘vote’.
Ha kane ka sngi la sakhi ruh ïa ki nongïalam ka Voice of the People Party jong ka Mawkyrwat bad Ranikor Constituency kiba la pynpaw ka jingai khublei ïa ki paidbah kiba la pynjop donburom ïa ka VPP ha baroh ar tylli kine ki Constituency.
