Shillong, Jylliew 06
U kyrtong ba la pynïeng da ka Regional Democratic Alliance (RDA) kaba dei kynhun synrop hapdeng ka UDP bad HSPDP u Bah Robertjune Kharjahrin ha kane ka ilekshon MP kaba dang shu dep, u la ïoh tang 1460 ‘vote’ na 2 tylli ki konstitwensi kiba la mihkhmat da ki MLA ka HSPDP.
U Bah Robertjune u la ïoh tang 840 ‘vote’ na ka Mawthadraishan Konstitwensi ba la mihkhmat da u Bah Shakliar Warjri, MLA ka HSPDP uba long ruh u Myntri ka Sorkar Jylla bad na ka Mawshynrut Konstitwensi ba la mihkhmat da u Bah Methodius Dkhar pat u la ïoh tang 620 ‘vote’ .
Lah ban kdew ba ka UDP ka don haduh 12 ngut ki MLA bad ka HSPDP ka don 2 ngut. Hynrei ha kane jingïaid lynti ban ïalap ïa ka ilekshon MP Lok Sabha na Shillong Parliamentary Konstitwensi kaba la long ha ka 19 tarik u Ïaïong, 2024 na ka bynta u kyrtong ka United Democratic Party (UDP) Bah Robertjune Kharjahrin, dei tang u President ka HSPDP bad katto-katne ki nongïalam kiba la mih shakhmat ban leit pan jingkyrshan na ki paidbah, katba kine ki 2 ngut ki MLA ka HSPDP kim shym la mih madan satia ban pynpaw ïa ka jingkyrshan.
Ha ka risol ba la pynbna ha ka 4 tarik mynta u bnai, u kyrtong ka UDP um shym la lah satia ban khie khlieh bad u la ïoh tang 44,563 ‘vote’ na 36 tylli ki konstitwensi jong ka rilum Khasi bad Jaiñtia.
Ha kitei baroh ar tylli ki konstitwensi ba la mihkhmat da ka HSPDP, la jop kput da u kyrtong ka Voice of the People’s Party (VPP) u Dr Ricky A.J Syngkon uba la kylla long mynta u MP bathymmai ka Shillong Parliamentary Konstitwensi da kaba ïoh haduh 25595 ‘vote’ na Mawthadraishan bad 11769 ‘vote’ na Mawshynrut.
Shuh shuh, kum ban shu kdew ba u Bah KP Pangniang, President ka HSPDP u dei tang ma u bad kiwei ki nongkitkam ka seng kiba mih ban pan jingkyrshan paidbah na ka bynta u Bah Robertjune Kharjahrin. Na ka konstitwensi kaba u Bah Pangniang u la ïoh ban mihkhmat mynshwa, ka UDP ka la ïoh tang 1039 ‘vote’.
Kumta nalor ka jingjah ki MLA ha ka por ïalap ilekshon bad ka jingïoh ‘vote’ tang khyndiat, ka wanrah ka jingtharai ba ka HSPDP ka la shet shukor ïa ka UDP.
Na ka liang ka UDP, lyngba u Bah Metbah Lyngdoh kum President, ha ka janmiet jong ka 5 tarik u Jylliew, 2024, ka la kynthoh ba ka jingjop kput jong ka VPP ka dei ka jingangnud u paidbah bad kum ka seng kan wad ïa ki daw balei ka shah rem wat hapdeng ka jingdon haduh 12 ngut ki MLA.
Katba na ka liang jong u Bah KP Pangniang pat kum u nongïalam ka HSPDP um shym la treh ban kren eiei halor kane sha ki lad pathai khubor haba pan jingkynthoh na u halor ka risol ka ilekshon MP Lok Sabha na Shillong Parliamentary ba dang shu dep. Lehse lah ban ong ruh ka daw ka dei ba u sngewrem ba ka jop ka VPP ba la ïalam da u Bah Ardent Miller Basaïawmoit kum u President uba la long teng u President ka HSPDP ha ki snem ba la leit.
