Shillong, Jylliew 06
Ki kyntien kiba la kren da ka nongïalam ka Congress ka Debora C Marak ha shwa ka ilekshon ki la urlong shisha halor ka jingjop ka Congress na Tura ha kane ka ilekshon Lok Sabha kaba la syrïem kumba jop ka NPP ha ka ilekshon MP ha u snem 2014.
Hashwa ka ilekshon MP, ka Debora ka la ong ba ka Congress wat lada ka don tang uwei u MLA na Rilum Garo kan jop beit na Tura kumba jop ka NPP ha ka ilekshon MP ha u snem 2014 Ka Debora ka la pynkynmaw ba ha u snem 2014, u Purno Agitok Sangma u la jop na Tura kum u MP da kaba pynliem ïa ka Congress kaba don bun ngut ki MLA ha kato ka por wat haba ka NPP ka don tang 2 ngut ki MLA, kita u James PK Sangma bad u Nihim D Shira.
Ka la ong ba ha kane ka ilekshon MP 2024, ka Congress tang u Saleng A Sangma kum u MLA na Rilum Garo hynrei kan jop beit da ka jingkyrshan ki paidbah.
Kumta kane ka jingong ka Debora ka la urlong shisha ha kaba u Saleng kum u kyrtong ka Congress ha kane ka ilekshon sha ka Ïingdorbar Thawaiñ Lok Sabha u la ïoh ïa ka jingjop na Tura da kaba pynrem noh ïa ka MP ka Agatha K Sangma da palat 1 lak 52 hajar vote.
Ha u snem 2014, u Purno u la jop biang kum u MP ka Tura da kaba pynrem ïa u kyrtong ka Congress u Daryl William da palat 40 hajar vote.
Ka jingjop u Purno ha u snem 2014 ka dei artad kaba khatduh namar tang ha u snem 2016 une u nongïalam ba paw ha ka ri India u la khlad noh khlem pat kut ka samoi jong ka Ïingdorbar Thawaiñ Lok Sabha ha kato ka por.
Kumta u Saleng u la thaw ïa ka khana namar u la lah ban knieh noh ïa ka jinglong MP na ka longïing jong u Purno hadien bun phew snem lyngba ka jingshahjied jong u kum u MP ka Tura parliamentary constituency.
