Mawkyrwat, Jylliew 07
Kawei ka ïing ha ka shnong 25 Mile kaba hap hapoh Ranikor C&RD Block, South West Khasi Hills District ha ka step 7 tarik u Jylliew, 2024 ka la shah bam duh ha ka ding kaba klang.
Katkum ka jingïathuh u Sordar Shnong ka 25 Mile, u Bah Brabis Wahlang u la ïathuh ba katei ka ïing ka dei ka jong u Bah Pynlang Khongstit (50 snem ka rta) bad u la ïathuh ruh ba u Bah Pynlang Khongstit u dei uba shong u sah marwei ha katei ka ïing.
U Bah Brabis Wahlang u la ïathuh ruh ba katei ka jingjia ka la jia ha ka por kumba 6 baje eiei mynstep hadien ba u Bah Pynlang Khongstit u la dep shet jingshet bad leitkai noh. Hynrei kyndit-kynsan, ka ïing jong u ka la kem ding bad ki marjan-marpa ki la ïamih ban tem ïa katei ka ding hynrei namar ka jingklang jong ka ding kim la lah shuh ban pynlip ïa ka.
Ha kaba ïadei bad katei ka jingjia, u Bah Wahlang u la ïathuh ba ka jingshah pynjulor ka la kot sha ka ?80 hajar eiei namar baroh ki jingdon-jingem kum u synsar, ka pisa bad ki tiar ki tar ki la ingkhong lut.
Halor katei ka jingjia, na ka liang ki bor shnong ki la leit ban noh jingïarap mardor ïa u Bah Pynlang Khongstit da u khaw, shini, ki tiar ki tar bad ki jaiñkup.
