Shillong, Jylliew 07
U Secretary ka Meghalaya Pradesh Congress Committee (MPCC), Bah Manuel Badwar u la ong ba ka seng kam pat shim ïa kano-kano ka rai haba ïadei bad u briew u ban mih bujli ïa u Saleng A. Sangma (uba mihkhmat ïa ka Gambegre konstitwensi) hadien ba u la shah jied kum u MP ka Lok Sabha ha kane ka ilekshon ba la dep.
“Ngim pat rai eiei halor kane bad ngin sa peit hadien katto-katne por. Ngin sa shong jingïalang lehse ha kane ka taïew ban wan haba ïadei bad kane ka bynta namar ngi sngewthuh ba kan sa wan ka ilekshon shiteng samoi,” la ong u Bah Badwar ha ka Sngi Thohdieng.
Ha kawei ka liang, haba kren shai ba u Bah Vincent H. Pala un dang bteng kum u President ka seng, u la ong ba kum ka seng ka dang kyrshan bad shaniah ïa u Bah Pala ban long u nongïalam ka MPCC.
U MLA ka Congress na Gambegre konstitwensi, u Saleng A. Sangma un sa iehnoh ïa ka jinglong MLA jong u ha ka taïew ban wan hadien ba u la shah jied kum u MP ka Tura Parliamentary konstitwensi ha ka ilekshon sha ka Ïingdorbar Thawaiñ Lok Sabha jong ka ri.
La ïathuh ba u Sangma u la pynkhreh ban phah ïa ka shithi iehnoh kam kum u dkhot ka Ïingdorbar Thawaiñ ka Jylla na Gambegre konstitwensi ha ka taïew ban wan hadien ba u la shah jied kum u dkhot ka Ïingdorbar Thawaiñ Lok Sabha na Tura hadien ka jingñiew ‘vote’ kaba la long ha ka 4 tarik mynta u Jylliew, 2024.
U Sangma u la don ha Parliament House mynta ban pynbit pynbiang ïa ki jingdonkam ha shwa ba un shim ïa ka jingsmai kum u MP ka Tura Parliamentary konstitwensi.
Ka Assembly Secretariat ha kane ka Jylla ruh ka la ïathuh ba haduh mynta, u Sangma um pat ai jingtip lano un aiti ïa ka shithi iehnoh kam kum u MLA ka Gambegre.
U Sangma u hap ban iehnoh ïa ka jinglong MLA hadien ba u la shah jied kum u MP namarba ka aiñ kam shah ban long lang u dkhot jong ka Ïingdorbar Thawaiñ ka Jylla bad u dkhot ka Ïingdorbar Thawaiñ Parliament.
U Sangma u dei u MLA ka Congress uba don tang marwei na Ri-lum Garo namar na ki 24 tylli ki konstitwensi ha Ri-lum Garo, ka NPP ka don 18 ngut ki MLA hynrei kam shym la lah ban jop. Hynrei u Sangma kum u MLA bad marwei ka Congress ha Ri-lum Garo u la lah ban jop na Tura konstitwensi.
Ka jingjop u Sangma na Tura konstitwensi ka la pynshaïong ïa ki MLA ka NPP kaba kham bunpaid hynrei u jop u MLA uba don tang marwei kum u nongïalam.
U Sangma u la ïoh ka jingjop kaba pynkyndit ïa kiba bun namar u la lah ban pynliem ïa ka longïing jong u Purno Agitok Sangma hadien bun phew snem.
Ynda u Sangma u iehnoh kum u MLA, ka ilekshon shiteng samoi ka hap ban don na ka bynta ban jied ïa u/ka MLA bathymmai na Gambegre konstitwensi.
