Shillong, Jylliew:
Ka Jaiñtia Student’s Union (JSU) ha ka 3 tarik u Jylliew 2024 ka la leit ban ïakynduh ïa ka Director General of Police ka jylla, ka Kong Idashisha Nongrang ha ka shlem treikam jong ka ban aiti da ka jingthoh ban pynsngew sha ka ïa ki jingeh bad kiba bun ki jingujor kiba ka seng ka la ïohpdiang.
Ha ka jingïakynduh kaba la shim por da ki kynta ha ka jingïakren bad ka DGP ka jylla, na ka liang ka seng ka la buh ïa kiba bun ki mat ban pynsngew sha ka DGP.
Ki mat kiba ka seng ka buh shakhmat ka long ban dawa ba dei ban pynkhlaiñ ïa ki Border Outpost khnang ban lait na ka jingshah thombor ha ka sorkar Assam namar kaei kaba la jia ha ka shnong Mukroh ha kaba 5 ngut ki mynsiem briew ki la hap ban duh noh na ka jingshah thombor ha ki bor jong ka sorkar Assam.
Haba ai jingkren, na ka liang ka seng ka la ong ba ka jingbuh ka sorkar ïa ki Border Outpost ha khappud ka long tang ban shu buh ban pyni ïa ka kam, hynrei ka jaka sah ki pulit pat ka long kaba shu tap tang da ka tin bad wat ka jaka leit shabar ruh kam don.
Ka seng ka ïoh ban ïakren ruh halor ka jingjyllei u drok bad u kynja hapoh ka jylla, kaba ym lah shuh ban tehlakam wat ki khynnah kiba dangrit kyrta ki la ngop bad kyrni ha kine ki jait jingdih pynbuaid.
“Kawei kaba sngewphylla haduh mynta ka long ba ka jingdie ïa u drok bad kynja ka la long ha ki jaka paidbah, ngi kyrpad ïa i Kong Idashisha lyngba tnad pulit ba ki pulit ki dei ban leh ïa kaba donkam halor kane”, la ong ki nongïalam ka JSU.
Na ka liang ka seng ka la kyrpad ruh ïa ka DGP ka jylla ba kan khot da ka jingïalang hapdeng ki Synjuk Waheh Shnong, ka tnad pulit, ki jaka pule puthi, ki nongtrei mon sngewbha, ki sengbhalang khnang ba yn lah ban pynsngewthuh ïa ki paidbah ha kaba ïadei bad ka jingsniew jong kine ki jingdih pynbuaid.
Shuh shuh ka seng ka la ïoh ban ïakren ba ka tnad pulit ka dei ban wanrah noh ïa ka jaka ïaleh eksam ne ka jaka ban peit ïa ka met ka phad na ka bynta kito kiba thep kam pulit hapoh Rilum Jaiñtia namar hapoh ka Jaiñtia ki dang don bun kiba dang duk-dang kyrduh bad ka shem jingeh ïa ki ba kin wan shaduh nongbah Shillong ban ïaleh ïa ka eksam na ka bynta ka kam pulit.
“Na ka liang ka Kong Idashisha ka la ïathuh ïa ngi ba ka Jaiñtia kan ïoh noh ïa la ka jong ka jaka ïaleh eksam ha kaba ïadei bad ka jingpeit ïa ka met ka phad ha kawei ka sien pynrung kam pulit”, la ong ki nongïalam.
Katba kawei pat ka mat ka dei halor ka jingshah ban beiñ ki kynthei khynnah man ka por kaba kum ka seng ka la wanrah ïa ka jingkyrpad na ka Kong Idashisha Nongrang ba ka tnad pule ka dei ban buh noh da ki ‘helpline number’ ka ban treikam baroh 24 kynta khnang ba ki kynthei khynnah kin lah ban phone ha utei u nombar ba kin ïoh ïa ki jingïada kiba paka.
