New Delhi, Jylliew 07
U nongïalam ka BJP bad ka National Democratic Alliance (NDA), u Narendra Modi, ha ka Sngi Thohdieng u la shah thung kum u Myntri Rangbahduh ka Ri India ha ka President, ka Droupadi Murmu, hadien ba ka kynhun NDA ka la ïoh bun tam eh ki MP ha ka ilekshon MP Lok Sabha.
Na ka liang ka President ka la aiti ïa ka shithi ba ka la thung ïa u Modi kum u Myntri Rangbahduh, bad ka jingpynbam smai ïa u kan long ha ka Sngi U Blei ha ka por 7:15 janmiet ha Rashtrapati Bhavan.
Kan long ka sien kaba lai ba u Modi un bam smai kum u Myntri Rangbah-duh. Ka sien banyngkong ka la long ha u snem 2014 bad hadien kata, ha u snem 2019. U Modi un dei uba ar napdeng ki ‘riew saiñpyrthei ha Ri India, hadien jong u Jawaharlal Nehru, ban shah pynbam smai kum u Myntri Rangbahduh haduh lai sien kynthih.
U Nehru u la long kum u Myntri Rangbahduh ka Ri naduh u snem 1947 haduh 1964.
Hynne ka step, na ka liang ki MP ka BJP bad NDA ki la ïalum lang ban jied ïa u Modi kum u nongïalam jong ki bad hadien kata, ki seng kiba don ha ka shatri jong ka NDA, ki la leit ban ïakynduh ïa ka President bad ki la rah ruh ïa ki shithi ban pyni ba ki la rai ban ai jingkyrshan ïa u Modi ban shimti kum u Myntri Rangbahduh.
Katkum u kyrwoh na ka shlem treikam jong ka President, la ong ba ka kynhun NDA ba la ïalam da u President ka BJP, u JP Nadda, ka la ïakynduh ïa ka President bad la aiti ïa ka shithi ban pyntip ba u Modi u la shah jied kum u nongïalam ka BJP.
Nalorkata, ki nongïalam jong ki seng kiba don ha ka NDA ki la aiti ïa ki shithi ban pyni ba ki kyrshan ïa u Modi.
Kiwei pat ki nongïalam ha ryngkat u Nadda kiba la ïakynduh ïa ka President ki long u Rajnath Singh, Amit Shah, Ashwini Vaishnaw bad u Dr. C.N. Manjunath na ka BJP; u N. Chandrababu Naidu na ka Telugu Desam Party; u Nitish Kumar, Rajiv Ranjan Singh (Lalan Singh) bad u Sanjay Jha na ka Janata Dal (United); u Eknath Shinde na ka Shiv Sena; u H.D. Kumaraswamy na ka Janata Dal (Secular); u Chirag Paswan na ka seng Lok Janshakti Party (Ram Vilas); u Jitan Ram Manjhi na ka Hindustani Awam Morcha (Secular); u Pawan Kalyan na ka seng Janasena; u Ajit Pawar na ka Nationalist Congress Party; ka Anupriya Patel na ka Apna Dal (Soneylal); u Jayant Chaudhary na ka Rashtriya Lok Dal; u Joyanta Basumatary na ka United People’s Party Liberal; u Atul Bora na ka Asom Gana Parishad; u Indra Hang Subba na ka Sikkim Krantikari Morcha; u Sudesh Mahto bad u Chandra Prakash Choudhary na ka All Jharkhand Students Union; bad u Ramdas Athawale na ka Republican Party of India (A).
Ka President, hadien ba ka la sngewthikna ba ka NDA ka lah ban thaw ïa ka sorkar bathymmai namar ka jingbun paid ha ka Lok Sabha kaba 18, ka la thung ïa u Modi kum u Myntri Rangbahduh ka Ri India katkum ka Article 75(1) jong ka Riti Synshar.
