Shillong, Jylliew 07
U Myntri ka tnat Social Welfare u Bah Paul Lyngdoh u la bteng biang ban ïasyllok bad ki kynhun bapher bapher na ka bynta ban ïakhun tyngeh ïa u drok ha kaba u la lum ïa ka jingïalang ha ka Sngi Thohdieng da kaba khot lang ïa ki MLA, MDC bad ki Rangbah Shnong na 76 tylli ki shnong kiba hap hapoh ka Greater Shillong Area da ka jingthmu ban jop ïa kane ka thma kaba la ktah ïa ka imlang ka sahlang.
Ïa kane ka jingïakynduh lang la pynlong ha State Convention Centre ha kaba u Myntri u la maitphang shaphang ka Drug Reduction Elimination & Action Mission (DREAM) kaba la sdang naduh u Jylliew 2023 kaba dei ka thong ban tei ïa ka Meghalaya kaba lait na u drok lyngba ki buit kiba bun bad jingïatreilang jong baroh ban ratdyngkhong ïa jingpyndonkam ïa u drok bad jingdie ïa une u jingdih uba pynsniew ïa ki samla bad kata ïa ki longïing bad ka imlang sahlang.
Ka DGP, Kong Idashisha Nongrang ruh ka la donlang ha kane ka jingïasyllok ha kaba ka tnat Social Welfare bad ka tnat Pulit kin ïatreilang lem bad ki bor district khamtam ka shlem treikam u Deputy Commissioner ka East Khasi Hills district.
U Bah Paul u la ong ba ka long kaba donkam eh ban phaikhmat sha kane ka jingeh kaba ktah ïa ka imlang ka sahlang da kaba shim ïa ki lad ki lynti bad ki buit kiba lah ban khanglad ïa ki samla ban nym ngat ha une u jingdih basniew.
Na ka liang ki nongïalam shnong ki la pynpaw ba ka long kaba donkam ban buh shuh shuh bun tylli ki jaka ban pynbha pat (rehabilitation centre) na ka bynta kito kiba la kyrni lyngba ka jingkyrshan ka DREAM Mission.
Na ka liang u Bah Paul u la kdew ba ha kiba bun ki jingïalang la ïakren ba kaba donkam eh ka long ban peit biang bad pynthymmai ïa ki Village Defence Parties (VDPs) ha ki shnong khamtam namarba ki shnong kiba la pynrung kyrteng ki dang long tang 11 tylli.
Kumta u Myntri u la pynbna hapoh ar taïew, kan don shuh ka jingïakynduh bad kiba bun kiwei pat ki kynhun kiba donbynta ban ïakhun ïa kane ka thma pyrshah ïa u drok kynthup ruh bad ki kynhun niam bad ki skul da kaba phaikhmat kumno ban kyrshan lang ïa kane ka jingthmu.
Hadien ka jingkren u Bah Paul, la don ruh ka jingïaphylliew jingmut bad jingkylli kiba wan ki Dorbar bapher bapher ha ryngkat ki jingai jingmut kumno ban ïakhun ïa kane ka jingsniew da kaba shim ïa ki sienjam kiba tyngeh bad pyrkhing khnang ban lah ban tehlakam ïa ka jingjyllei u drok.
Ha kane ka jingïalang phylliew jingmut la wan ïashimbynta lang da ki MLA kiba kynthup ïa u Bah Sanbor Shullai bad kiwei kiwei MLA na North Shillong, Mawlai, MDC na Nongthymmai, MDC Mawkhar-Pynthorumkhrah, MDC na Mawlai nalor ki ophisar ka tnat Social Welfare, tnat pulit bad ki VDP kiba la wan lang bad ki Dorbar Shnong bapher bapher.
