Shillong, Jylliew 07
Ka Voice of the People Party (VPP) kan sa pynlong ïa ka jingïalang jingjop lashai ka Sngi Saitjaiñ ha ka por 11:00 baje mynstep ha madan Smit, kaba hap ha Nongkrem Constituency, East Khasi Hills District na ka bynta ban ai khublei ïa ki paidbah kiba la pynjop donburom ïa u kyrtong ka VPP u Dr. Ricky AJ Syngkon ha kane ka ilekshon MP Lok Sabha na Shillong constituency.
Katkum ka jingpynbna u Bah Ardent Basaïawmoit kum u President ka VPP ha ka 4 tarik mynta u bnai hadien ba la mih ryngkat bad u Dr. Ricky AJ Syngkon na Polo, u la ong namar ba kiwei ki nongkitkam bad ki nongkyrshan ki don ha ki district bapher-bapher haba ki leit ban ñiew ‘vote’ kumta ban ïoh ban ai khublei ïa baroh la pynbeit ban pynlong ha Smit lashai ka sngi ka 8 tarik Jylliew 2024.
Kane ka jingïalang ai khublei ïa ki paidbah ka dei namar u kyrtong ka VPP uba la shah jied kum u MP ka Shillong constituency u la ïoh 571078 vote da kaba tam haduh 371910 vote ïa u kyrtong ka Congress uba dei u MP barim u Bah Vincent Pala uba ïoh 199168 vote bad ka kyrtong NPP ka Kong Ampareen Lyngdoh ka la wan balai da kaba ïoh 186488 vote, u kyrtong ka RDA u Bah Robertjune Kharjahrin u wan basaw bad ïoh 44563 vote.
Ha kane ka jingïalang ha Smit yn don lang u Dr. Ricky AJ Syngkon kum u MP ba dang shah jied, u Bah Ardent Basaïawmoit kum President ka VPP, ki MLA ka VPP, ki nongkitkam ka sengkmie bad ki nongkitkam na ki constituency bapher bapher jong kane ka seng.
Katkum ka khubor ba la ïoh lum u Dr. Ricky AJ Syngkon un sa leit sha Delhi lashem taïew ban dang pynbiang ïa ki kot ki sla ha shwa ban shah pynbam smai kum u MP bathymmai ha dorbar Parliament.
