Shillong, Jylliew 07
U President ka Hill State People’s Democratic Party (HSPDP) Sengkmie, Bah KP Pangniang u la pyntip ba lashem taïew un sa lum ïa ka Central Executive Committee (CEC) jong ka HSPDP ban ïakren halor ka ilekshon MP Lok Sabha na Shillong constituency.
Haba kylli balei u kyrtong ka Regional Democratic Alliance (RDA), Bah Robertjune Kharjahrin u rem ha kane ka ilekshon ha West Khasi Hills District kaba dei ka district ba khlaiñ ka ktem u Sing, u Bah Pangniang u la ong ba ïa mynta um pat kwah ban kren eiei hynrei un sa kren ynda la shong ïa ka CEC ka HSPDP.
“Ngin dang ïatreilang bad ka UDP ha ka RDA namar wat ka BJP ruh ka dang donkam ïa ka jingïatreilang ha ka sorkar synrop namar ban ïaid marwei ka shem shitom” u la ong. U la ong ba wat la ka seng HSPDP ka ïatreilang bad ka UDP ha ka kynhun RDA, hynrei ïa ka nongrim kaba ka seng HSPDP ka ïeng naduh mynshwa kan nym kylla.
Shuh shuh u la ong ba ïa mynta um lah ban kren marwei namar u donkam ban sngap ïa ka jingai jingmut jong ki baroh ki dkhot ha ka CEC bad hangta un sa lah ban jubab. Kum ban shu kdew, u kyrtong ka RDA Bah Robertjune Kharjahrin u la ïoh duna ‘vote’ na ki ar tylli ki constituency ba long MLA da ka seng HSPDP ha Mawthadraishan ba mihkhmat u Bah Shakliar Warjri bad Mawshynrut constituency ba mihkhmat da u Bah Methodius Dkhar.
Ha Mawthadraishan constituency u kyrtong ka RDA u ïoh 840 vote, katba u kyrtong VPP u ïoh 25595 vote, ha Mawshynrut u kyrtong RDA u ïoh 620 vote bad u kyrtong ka VPP u ïoh 11769.
Ka jingrem kput u kyrtong RDA ha kine ki constituency ka lah ruh ban dei ba ki MLA ka HSPDP kim shym la mih wat tang shisien ban ïalap ilekshon ïa u Bah Robertjune Kharjahrin uba ïakhun na ka shap jong ka Bom.
