Nongpoh, Jylliew:
Ka skulbah University of Science and Technology Meghalaya (USTM) ha ka Sngi Saitjaiñ ba la dep ka la plie paidbah ïa ka Jahanara and Anwar Saikia Center for Peace Studies, kaba la thaw kyrpang na ka bynta ban pynlong ïa ka jingpule wad bniah (peace research and studies) halor ka shongsuk-shongsaiñ jong ka thaiñ Shatei Lam Mihngi bad ki jaidbynriew bapher bapher kiba don ha ka.
Ïa kane ka jaka pule bad wad bniah kaba la ai nam kyrpang ha ka kyrteng jong ki kmie ki kpa ka Professional Yasmin Saikia, kaba dei ka Hardt-Nickachos Chair jong ka Peace Studies ka Arizona State University jong ka ri USA bad la plie paidbah ruh ha ka jingïadon ryngkat jong ka hapoh ka jinglam khmat jong u Professor Gauri Dutt Sharma, Vice Chancellor jong ka USTM.
Ka Professor Yasmin Saikia ka la noh synñiang ruh kumba 1 klur tyngka sha ka skulbah USTM na ka bynta ban tei ïa kane ka jaka pule bad wad bniah ha ka jaka jong katei ka skulbah bad la khmih lynti ba kane ka jaka ban long kum ka shlem pule bad wad bniah halor ka shongsuk shongsaiñ jong ki ri kiba hap ha ka thup ASEAN.
U Chancellor jong ka USTM, u M Hoque u la pynpaw ïa ka jingsngewnguh shikatdei ïa ka Professor Yasmin Saikia bad ka ïing ka sem ka jong ka, kiba la noh synñiang ban pynurlong ïa kane ka jaka pule wad bniah kaba katei ka Professor kan long ruh kum ka Founding Director bad u Dr. Trishna M Thakuria kum u Coordinator.
U Professor GD Sharma haba kren ha kane ka sngi plie paidbah ïa kane ka shlem pule bad wad bniah ïa shongsuk-shongsaiñ, u la pynpaw ïa ka jingkyrmen skhem ba kane ka shlem kan kyntiew kyrdan ïa ka skulbah USTM ha ka pyrthei bad ai khublei kyrpang ruh ïa ka Professor Yasmin Saikia halor ka jingkyrshan jong ka ban pynurlong ïa kane ka jaka pule bad wad bniah.
Na ka liang ka Professor Yasmin Saikia haba ai jingkren ka la ïathuh khana halor ka jingshem bad jinglap jong ka ha ki skulbah jong ka ri USA kiba la ban pynlong ïa kane ka jaka pule bad wad bniah ban long ka shlem jong ki stad wad bniah ban wahrah ïa ka jingkylla ha ka imlang ka sahlang. Ka la ban jur ruh ba ka skulbah USTM ka dei ban phai khmat kyrpang ban pule bad wad bniah ïa ka shongsuk-shongsaiñ lyngba kane ka shlem kaba ïa u mawnongrim la buh naduh u snem ba la dep hapoh ka jaka jong kane ka skulbah.
