Jowai, Jylliew 07
Ka Jowai Presbyterian Higher Secondary School (JPHSS) ha ka 7 tarik Jylliew ka la pynkut noh ïa ka jinglehkmen jubili rupa.
Kane ka skul ka dei kaba la seng da ka Balang Jowai Presbyterian naduh u snem 1999.
Kiba ïadonlang ha kane ka sngi pynkut ki kynthup ïa u MP Rajya Sabha, Dr. W.R. Kharlukhi kum u kongsan, MLA ka Jowai, Bah Wailadmiki Shylla, u Dolloi ka Elaka Jowai, Bah Puramon Kynjing, ki nongsharai Balang, ki longkmie longkpa, ki khynnah skul kiba mynta kumjuh kiba pyndep ïa ki jingpule ha kine ki 25 snem ba la dep na katei ka skul, ki nongshah khot sngewbha bad kiwei-kiwei.
Ha kane ka sngi la pyllait ruh ïa ki maw nongrim ban sah jingkynmaw kumjuh ka kot sah kynmaw (Souvenir) jong ka skul ba la pyllait da u Rev. E. Nongpluh bad ka jingpynher ïa 25 tylli ki balun da u Tbn. B.N. Lamare kumjuh ka jingpynkup burom ïa ki nonghikai jong kane ka skul.
U Dr. W.R. Kharlukhi haka jingkren u la ai ka jingïaroh ïa ka Balang bad ki nongpynïaid kiba don ka jingïohi jngai ïa ka jingdonkam ka pule puthi bad ruh kiba la kyrshan ban pynbit pynbiang ïa kane ka skul kumba ka long mynta.
U la kyntu ruh ïa ki khynnah ba ki dei ban trei shitom bad sheptieng ïa U Blei khnang ba kino-kino ki jingïaleh ne ki thong kin urlong ha ka jingim ka jong ki.
U Wailadmiki Shylla ha ka jingkren u la ong, ban seng ïa ka skul kam dei ka kam kaba suk, kumta u la ïaroh ïa ki nongpynïaid jong kane ka skul kiba la trei shitom khlem shong thait na ka bynta ban pynnang pynstad ïa ki khynnah.
Ha kajuh ka por, u la kyntu ïa ki bor pynïaid jong ka skul ba kin bteng ban trei shitom shuh-shuh khnang ban pyntikna ba ka skul kan nangroi bad kan nangkiew shaphrang ha ka lynti ïaid ka jong ka.
Ha kaba ïadei bad ki jingdonkam jong ka skul ba la aiti lyngba ka dorkhas, na ka liang u MP bad MLA ki la kular ban pyrshang ban ïakren bad u Myntri Rangbah.
Kane ka jingrakhe ka la long kaba iphuh-iphieng da ka jingshim bynta ki khynnah skul ha ki jingrwai bad jingshad bad la pynkut da ka jingsam khusnam sha ki nongjop kiba la shim bynta ha ki jingïakop bapher-bapher ha ka jingrakhe ïa ka tamasa Jubili Rupa.
Ïa kane ka skul la sdang tang ha ka kyrdan Secondary bad ha snem 2011 la kyntiew sha ka Higher Secondary School da kaba sdang shuwa ïa ka ‘Arts Stream’.
Ka jingdon jong ki khynnah kata haduh u snem 2023 ka long 522 ngut.
