Shillong, Jylliew 07
Ka jingshong shah thngan jong ka Kong Bindas Syiem hakhmat ka Additional Secretariat kaba la ïaid palat ïa ka 24 kynta tam ha ka 7 tarik u Jylliew ban dawa pynbha bad maramot ïa ka surok na Nongpoh Umden sha Sonapur kaba hap ha Ribhoi District, ka la pynlong ïa ka met ka phad jong katei ka longkmie ban sdang kem tlot.
Na ka liang ki doktor jong ka tnad ka koit ka khiah ha ka janmiet jong ka Sngi Thohdieng ka 7 tarik u Jylliew ki la wan ban peit bad khmih ïa ka koit ka khiah jong ka Kong Bindas Syiem da kaba thew ïa ka Blood Pressure (BP) bad test ïa ka snam.
Haba pyrshang ban kylli halor ka koit ka khiah jong ka Kong Bindas na kitei ki doktor hynrei kitei ki doktor kim shym la treh satia ban jubab eiei halor kane. Haba kylli pat na ka Kong Bindas Syiem, ka la ïathuh ba ki doktor ki la pyntip sha ka ba haduh katei ka khyllipmat kam don kano kano ka jingpang ha ka met lait noh tang ka jingtlot ha ka met na ka daw ka jingbym bam eiei.
“Ki doktor ki la thew ïa ka shini bad ka BP bad ki la ong ba ki biang lut nadong shadong hynrei ki la ong tang kata ka jingtlot ha ka met jong nga namar ba nga khlem bam”, la ong ka Kong Bindas.
