Shillong, Jylliew 07
Ka tnat Income Tax (IT) kan pynlong ïa ka Tax Payers’ Hub ha nongbah Shillong na ka bynta ban ai jingtip bad ai jingshai shuh shuh ïa ki nongsiew khajna ha kaba ïadei bad ka aiñ Income Tax, bad kumno ban pynbeit ïa ki jingeh kiba ïakynduh da ki nongsiew khajna.
Ha kane ka Tax Payers’ Hub, ka tnat IT kan ai jingshai halor kiba bun ki mat kum ka lad ban ïoh biang ïa ka pisa kaba shah oh khajna, ka rukom oh khajna na ki jingkamai, ka jingpyllait ïa ki riewlum na ka aiñ oh khajna nalor ka jingïoh khajna ha thep pisa bad sei pisa na ki jaka kynshew pisa (bank).
Ïa kane ka tax payers’ hub yn pynlong ha Shillong Club naduh ka 10 tarik haduh 12 tarik u Jylliew katkum ka jingpynbeit jong ka Directorate of Income Tax (Public Relations, Publication and Publicity), Central Board of Direct Taxes, Ministry of Finance, New Delhi.
Ka Principal Director General of Income Tax (Admn and TPS), New Delhi ka Archana Choudhury kan wan plie ïa kane ka Tax Payers’ Hub ha ka 10 tarik u Jylliew ha ka por 12 baje shiteng sngi ha ka jingdonlang ka Principal Chief Commissioner of Income Tax, NER, Guwahati, ka Chaitali Panmei.
Haba kren sha ki lad pathai khubor ha ka sngi Thohdieng, u Principal Commissioner of Income Tax, u Bah D.A.J. Sawkmie u la ong ba ka Tax Payers’ Hub ka dei ka bynta ha kaba ka tnat IT ka shim ban ai jinghikai ïa kiba siew khajna bad ban ai jingtip shuh shuh ha kaba ïadei bad ka aiñ Income Tax Act bad kumno ban pynbeit ïa ki jingeh kiba ju ïakynduh da ki nongsiew khajna bad ban pynshlur ïa kiba siew khajna ban bud da ka monsngewbha ïa ki kyndon, bad ki Schedule Tribe na ka Thaiñ Shatei Lam Mihngi (NER) kiba dei ban lait na kaba siew khajna hapoh ka kyndon 10(26) jong ka IT Act.
U Bah Sawkmie u la ong ba kin don shibun ki jingtip ki ban sa ai sha kito kiba wan ban ïashimbynta ha kitei ki sngi.
Haba kylli shaphang ka jingïoh ka Jylla na ka jingïasam khajna hapdeng ka Sorkar Jylla bad Sorkar Pdeng, u Bah Sawkmie u la ïathuh ba ka bhah ba ïasam ïa ka khajna na ka bynta ka Meghalaya ka long T. 9,600 klur bad ka jingïoh lum khajna ka Thaiñ Shatei Lam Mihngi ka long T.10,000 klur bad tang ka Shillong Range, ka ïohlum T.300 klur ha u snem ba la dep.
