Shillong, Jylliew 07
Ka Khun Hynñiewtrep National Awakening Movement (KHNAM) ka la phah shithi biang sha u Chief Executive Member (CEM) ka KHADC namar haduh mynta ka Council ka khlem pat pyndonkam ïa ki kyndon jong ka Non-Tribal Regulation 1954, Rules ban weng ïa uwei bar Jylla uba kyrteng u Singhania uba ïoh kontrak ha NEIGRIHMS bad pynpaw ruh ba ka seng ka la ïoh khubor ba une bar jylla u don tang kawei ka laisen khaïi (trade license) ïa kaba u pyndonkam ban trei bun jait ki kam khaïi.
Ha ka shithi sha u CEM ka KHADC, u Working President ka KHNAM, u Bah Thomas Passah u la pynkynmaw halor ka jingujor jong ka seng pyrshah ïa u Singhania halor ka jingïoh kontrak jong u ha NEIGRIHMS, khlem ka trade license kaba biang bad pynpaw ka jingsngewsih halor ka jingbymlah jong ka Council ban pyndonkam ïa ki bniat ka Regulation ban weng ïa utei u bar Jylla na katei ka kontrak kaba u la ïoh.
“Kane ka pynpaw ïa ka jingtlot ka rukom treikam ka Council kaba pynshlur pat ïa kiwei ban ïaid pyrshah ïa ki kyndon ka Council ha ki por ban wan. Ngi sheptieng ïoh kat ban shim kam ka Council, ka kontrak jong une u bar jylla kan kut noh hi,” la pynpaw u Bah Thomas ha ka shithi.
Une u nongïalam ka KHNAM u la ong ba ka seng ka la ïoh khubor ba une u bar jylla u don tang kawei ka trade license ïa kaba u pyndonkam ban trei bun jait ki kam khaïi kaba long pyrshah ïa ka regulation jong ka Council.
“Ha kaba ïadei bad ka NEIGRIHMS, ngi kwah ban pynpaw ba u la pyndonkam da ka license supply tiar ban trei pat ïa ka kam ka bym ïahap bad ka license kaba u don,” la bynrap u Bah Thomas.
