Shillong, Jylliew 07
U President ka Voice of the People Party (VPP), Bah Ardent M. Basaïawmoit u la ther tyngeh ïa u Myntri Rangbah ka Assam, u Himanta Biswa Sarma halor ka jingkynnoh ba kawei ka niam ka la ïaleh pyrshah ïa ka kynhun National Democratic Alliance (NDA) kaba la ïalam sha ka jingshah rem noh jong ka kyrtong ka NDA ha Meghalaya.
“Kane ka dei ka khubor sha u Myntri Rang-bah ka Assam, u Himanta Biswa Sarma – um dei ban batai stad hynrei u dei ban peit ïa la ka jong ka kyrpong ïing,” la ong u Bah Basaïawmoit ha ka Sngi Thohdieng.
Ha kajuh ka por, u la ong ruh ba um don hok satia ban tuklar halor ki kam ki jam jong ka Meghalaya haba ïadei bad ka ilekshon MP kaba dang shu dep.
Lah ban kdew ba hadien ba la dep ka jingñiew ‘vote’ na ka bynta ka ilekshon MP Lok Sabha, u Himanta, haba kren sha ki lad pathai khubor ha Assam, u la kynnoh ba ka la don kawei ka niam kaba khlem kyrshan satia ïa ka NDA ha Nagaland, Meghalaya bad Manipur.
“Ha ka ri synshar paidbah kum ka India, ki nongshong shnong ka Meghalaya ki don ka hok ban jied ïa uno-uno u briew katba u dang dei u nongshong shnong ka India bad u long uba bit na bynta ban long kyrtong,” la ong u nongïalam ka VPP.
U la ong ruh ba ki paidbah ka Meghalaya kim dei kiba duna jingtip shaphang ki jingthmu, ‘agenda’ bad ki mat treikam jong ki seng saiñ pyrthei kiba ïashim bynta ha ka ilekshon naba kum ki nongshong shnong ka ri, ki don ka jinglaitluid ban jied ïa kano-kano ka seng kaba ki sngewmon.
U Bah Basaïawmoit u la pynrem jur ïa ka jingkren u Sarma halor ka jingkynnoh ba kawei ka niam ha Meghalaya ka dei ka daw jong ka jingrem ka kyrtong ka NDA ha kane ka ilekshon MP ba la dep.
“Nga kwah ban ong ruh ïa u ba ki Balang hapoh Meghalaya kim ju don bynta eiei ha ki kam jingjied nongmihkhmat saiñ pyrthei, hynrei kum ka jaidbynriew, ngi don hok ban jied ïa ka seng ne u kyrtong uba ngeit ha ka Riti Synshar ka India, uba burom ïa ki kyndon ka Riti Synshar ka India, uba ngeit ha ka jingbym don kano-kano ka jingïadei bad ka niam bad ka seng kaba ïada ïa ka bha ka miat jong ki ‘rit paid,” u la ong.
Haba pynrem jur biang ïa ka jingkren u Biswa, u President u la ong ba ka jingkren u Myntri Rangbah ka Assam ka long ka bym shisha bad kaba khlem nongrim.
Shuh shuh u la bynrap, “Ka jingkren jong u ha ka jingsngewthuh jong nga ka long tang ban ïalam bakla ïa ki paidbah bad pyrshang ban wanrah ïa ka jingsngewpher jaidbynriew hapoh ka ri ha kyrteng ka niam.”
“Nga tikna ba kine ki jingkren jong u ki la pynlehraiñ shi kat dei ïa ki nongshong shnong ka Assam bad ktah ruh ïa ki jingsngew jong ki nongshong shnong ka Meghalaya,” la ong u Bah Basaïawmoit.
