Shillong, Jylliew 07
Ka jingshong shah thngan kaba khlem buh por jong ka Kong Bindas Syiem hakhmat ka Additional Secretariat ka la ïaid 24 kynta tam ha ka 7 tarik u Jylliew na ka bynta ban dawa ha kaba ïadei bad ka jingmaramot ïa ka surok na Nongpoh Umden sha Sonapur, Ribhoi District.
Haba ïoh ban ïakren bad ka Kong Bindas Syiem, ka la ïathuh ba na ka liang ka Magistrate ha ryngkat bad ki pulit ki la wan ban pyntip ba u DC ka East Khasi Hills District, u SC Sadhu u la phah khot ban wan ïakren ha katei ka Sngi Thohdieng ha ka por 4 baje janmiet hynrei na ka liang ka Kong Bindas ka la kyntait war ïa kane ka jingshah khot ha u DC. Kane ka longkmie ka la pynphai nia kylla lada ki kwah ban ïakren bad ka, kin hap ban wan hi dalade sha ka jaka ba ka shong ban shah thngan.
“Na ka liang jong nga, ngan shong beit hangne katba kim pat ai ïa ka jingpyntikna na ka bynta ka 59 km. Na ka liang jong nga, nga la kyntait ïa kata ka jingkhot ïakren jong ki bad na ka liang jong nga, ngam lah ban leit ïakren ha ka ophis jong ki hynrei lada ki donkam ban ïakren bad nga, ki lah ban wan hangne ha ka jaka ba nga shong hangne ha surok”, la bynrap ka Kong Bindas.
Ka Kong Bindas ka la ong ruh ba na ka liang ki bor pynïaid distrik kim pat ai jingbit satia ïa ka ban shong shah thngan ha katei ka jaka wat haduh ka sngi kaba bud ruh bad ka la ong ba lehse kane ka jingbym shah ka dei namar ba ka la pyrshah ïa ka sorkar.
“Nga tharai ba shisien ba pyrshah ïa ka sorkar, da nga pan 10 ne 20 tylli ki jingpan jingbit ruh ban shong hangne, kin nym ai namar ba nga dawa na ka sorkar na ka bynta ka hok jong u paidbah”, la ong ka Kong Bindas.
Shuh shuh ka Kong Bindas ka la ïathuh ruh ba na ka liang ki bor pulit ki la wan shaw ïa ka na katei ka jaka ban rah noh sha ka jaka sumar hynrei na ka liang ka Kong Bindas ka la kyntait mardor ïa kane ka jingtyrwa da kaba ong ba lada ki donkam ban peit ïa ka koit ka khiah jong ka, ki lah ban wanrah hi ïa ki doktor bad nos ha katei ka jaka ba ka don.
“Ngam don hok ba ngan mih nangne ba ngan leit sha ka jaka sumar bad kane kam don jingmut ba ngan wan shong shah thngan hangne”, la ong ka Kong Bindas.
Hadien katto katne por, na ka liang u Executive Engineer ka PWD (Roads) Nongpoh Division, u Bah M. Pyrbot u la wan ban pynshai ïa ka Kong Bindas halor katei ka jingslem ban maramot ïa katei ka surok kaba la sniew bad jot rathai.
Ha katei ka jingwan pynshai, u Bah Pyrbot u la ong ba ka la don 9 Km tam na ka lynter ba 59 Km duna ban maramot ïa ka surok bad ïa katei ka surok la tyrwa ban shna hapoh ka North East Infrastructure Development Scheme ha kaba katei ka jingshna ïa katei ka surok kan sdang na Nongpoh na ka National Highway-6 katba ka bynta kaba sah pat kaba long 44 Km la tyrwa ban pynrung lyngba ka PMGSY.
Na ka liang ka Kong Bindas haba sngap ïa ki jingbatai jong u Bah Pyrbot ka la ong ba shisien hi ba ka la mih sha madan ban shong shah thngan kan nym kynran dien tad haduh ba kan da don kata ka jingpyntikna kaba shisha ba yn shna ïa ka surok.
