Shillong, Jylliew:
Ka Dorbar Shnong Lapangar ha ryngkat ka jingïatreilang bad ka HFU, Sengkmie mynnin ka sngi ki la pynlong da ka jingïaid paidbah bad thang mombati kum ka dak ban pynrem halor ka jingshah pynïap dusmon jong uwei u nongrep ha lyngkha.
Ha katei ka jingïalang la wan ban ïasnoh kti lang da baroh ki paid nongshong shnong bad kumjuh ki dkhot na ka JNC bad KSU.
Ha katei ka jingïalang, ki nongkren ki la pynpaw ïa ka jingsngewkhia halor ka jingshah pynïap ki nongrep kaba jia na ka por sha ka por bad dawa na ka Sorkar ba ka dei ban siew ïa ka bai lutksan ïa katei ka longïing.
La lah ban sngewthuh ba ka don ka jingsuba ba utei u nongrep uba shah pynïap ka daw ka dei namar ki kam kajia pud hapdeng ka Meghalaya bad Assam namar katkum ka jingïathuh ki nongshong shnong, utei u nongrep u la shah byrngem teng.
Wat la na ka liang ki pulit haduh mynta kim pat lap ksai halor katei ka jingjia, mano ba pynïap ïa utei u nongrep, hynrei na ka liang ki paidbah ki pynbor ïa ka Sorkar lyngba ka tnat pulit ban shimkhia ïa kane ka jingjia bad dei ban kem mardor ïa kiba donkti.
Ka Hill Farmers Union (HFU) ha katei ka sngi ka la shim ïa ka rai ban leit ïakynduh bad pynsngew ïa katei ka mat sha ka DGP ka Jylla na bynta ban ai jingïada ïa ki nongrep kiba don hapdeng ka jingsheptieng wat ban leit sha lyngkha haduh mynta bad ban leit ai da ka dorkhas sha u Symbud Myntri Rangbah ka Jylla ba khmih ïa ka tnad kam pohïing.
