Shillong, Jylliew 09
Ka Hynñiewtrep Inte-grated Territorial Organization (HITO) ka la dawa na ka Sorkar Jylla ban pynkynriah kam mardor bad pynshitom ïa u heh pulit lem bad ki nongbud jong u halor ka jingkynnoh leh donbor ha ka miet Sngi Saitjaiñ ha ka jaka shong shah thngan jong ka Kong Bindas Syiem kaba ha ka jaka pynïeng kali hajan Additional Secretariat.
Katkum ki khubor kiba la mih, ha ka miet Sngi Saitjaiñ, ki pulit ka distrik ki la wan poi ha ka jaka shong shah thngan ka Kong Bindas Syiem da ka jingthmu ban pynkynriah jubor ïa ka na katei ka jaka ban rah (ïa ka) sha ka jaka ai jingsumar ban khmih bniah ïa ka koit ka khiah jong ka. Hynrei ka jingthmu jong ki pulit ka la pulom hadien ba la khang lad noh ïa ki da ki briew kiba shong pynshngaiñ lang ïa ka Kong Syiem ha katei ka jaka.
“Ka jingshah thngan jong ka Kong Syiem kam dei na bynta ïalade shimet, hynrei na bynta ka bha ka miat jong ka dong ka thaiñ Ri-Bhoi haba ïadei bad ka surok Nongpoh-Umden-Sonapur,” la ong u President ka HITO, Bah Donbok Dkhar haba kren sha ki lad pathai khubor ha ka Sngi U Blei.
“Ka jingwan jong u ‘In-Charge’ ka thanat Sadar nyngkong khlem ka ‘uniform’ kaba la pynkheiñ lypa namar lada phi peit ïa ki kyndon IPC, ka kdew shai ba ïa ki kynthei hi wat lada dei ki nongleh kam sniew ruh, ym ju bha ban kem hadien ka 6 baje ynda la sep sngi ne shuwa ka 6 baje ha shuwa ban mih sngi. Sa kawei ruh, ym dei ba u pulit shynrang ban wan hangne,” la ong u Bah Dkhar.
U la pynrem jur ïa uwei u heh pulit ba la kynnoh ba u la wan da ka jingbuaid tanglang hadien ba la sakhi katkum ki dur khih kiba la ring da ki dkhot ka seng kiba la synran ïa ka Kong Syiem. U la ong ruh, “Ngi pynrem ïa kane ka jingleh ka Sorkar kaba la bthah ïa ki pulit bad ngi sngewphylla ba naduh mynno ba kine ki pulit ki la wan pule ‘Medical’ bad naduh mynno ki la ïoh ïa ka syrnot ne dep pyntbit ban ong ba ki wan ban kylli halor ka koit ka khiah ka Kong Syiem.”
Haba pynsngew halor ka jingleh ba-heh jong ki pulit kaba na ka por sha ka por, u Bah Dkhar u la ong ba hynnin, la sakhi ba ki pulit ki wan ha katei ka jaka kum ki lehnoh, khlem ka ‘uniform’ ha ryngkat ka jingkah ïa ka durkhmat jong ki da ki jaiñ ïong. Halor ka jingkynnoh ba ki pulit kiba la wan ha ka miet Sngi Saitjaiñ ki la buaid, u la ong, “Ha kane ka kynti, ngi lah ban ong ba ki dei ki pulit buaid namar u la pynsakhi hi ba u wan da ka jingbuaid. Ban shu leh kumne, ban shu pyndom sah ïa ka jaidbynriew, ngan kren da kaba shai, ha ka jingshisha, ka kamram jong phi ka long ban pynbha bad ym ban ai ding shuh-shuh. Lada nang ai ding, peit ïoh ka jia kaei-kaei kaba sngewsih ha ka Jylla.”
“Ngi pynrem ïa ka jingleh ka Sorkar bad ka jingleh ki pulit, ki bym tip aiñ namar ka rukom leh jong ki kam long shuh kum kiba la nang la stad, hynrei ki long thik kum ki khynnah surok kiba shu kwah ban pyni bor khlem da bud ïa ka lynti jong ka aiñ,” u la ong.
Shuh shuh u la kyntu ïa ka Sorkar ban pynkynriah kam mardor ïa u heh pulit lem bad kito kiba synran ïa u ha katei ka miet kumjuh ban pynshitom bad pan ka jingpynshai na u.
Nalor kane, une u nongïalam u la ong ba lada ka Sorkar ka dang ïai sngap mynthi, ka seng kan sa shim da kiwei ki lad ki lynti bad kyntu ba haba wanrah da uwei u pulit ophisar un dei uba la nang la stad bad uba tip ïa ki kyndon aiñ kumjuh uba nang ban burom ïa ki “briew jong ngi bad ïa kiwei kumjuh”.
