Shillong, Jylliew:
U Rangbah Shnong Nongsder, Bah Jonas Lyndem u la kyntu ïa ka sorkar ba ka dei ban shna noh da kawei ka jingkieng kaba thymmai namar kane ka jingkieng kaba la don mynta ka la rim palat.
Haba ïakren bad u Bah Lyndem u la ong ba kane ka jingkieng Umïam kaba pynïasoh ïa ka Ribhoi bad East Khasi Hills District ka la palat 60 snem bad kam don jingmut shuh ban shu maramot namar long kumba maramot ïa ka dieng pyut, te kan pyut beit.U la ong ba ka sorkar ka la buh ïa ka thong ban pyndep ïa kane ka jingkieng haduh u bnai Jylliew hynrei mynta la ïohi ba ka dang shim por ba kan dep namar dang khoh ïa ka rong tang shiliang ka surok.
U la ong biang ba naduh ba phah ïaid tang shiliang ïa ki kali kiba kiew bad hiar na Shillong ka la ktah nyngkong ïa kiba leit pule namar kim lap shuh ha ka por kaba biang, nangta ki nongbylla bad ki nongtreikam sorkar.Shuh shuh u la pyntip ba naduh ba la khang ïa ki kali heh ban ïaid na jingkieng Umïam ka la ktah ïa ka ïoh ka kot naba ki mar ki mata ki la rem namar kiba wan khaïi ki hap leit thied na shabar.
U la ïathuh ruh ba ka jingdheng kali ka don ki sngi ba ka sahkut palat ar kynta bad poi shaduh Lad Umsaw bad haduh View Point Mawlai Mawïong hynrei ha ka Sngi U Blei ka jingsahkut kali ka kham duna.Namar kata, u la kyntu ïa ka sorkar ba kan kham pynsted ban pyndep ïa kane ka jingkieng khnang ban suk ka leit ka wan.Kum ban shu pynkynmaw ïa kane ka jingkieng la sdang ban phah ïaid shiliang surok naduh u Nohprah 2023 ban maramot namar ba ka la shong synjor.
