Nongstoiñ, Jylliew 09
Wat la ka Langpih ka dei kawei na ki jaka ïa kajia pud hapdeng ka Assam bad Meghalaya, mynta ha kine ki khyndait bnai, ki jingjia ïa thombor ki la sdang ban kynjah bad wanphai pat sha ka shongsuk shongsaiñ hynrei mynta kane ka jingïakynad ka la sdang pynban hapdeng ki para Khasi namar ka jingïakwah bor ha kane kane ka jaka kaba ka la sdang ban paw pyrthei.
Katkum ki tyllong khubor ba la ïoh lum, la ong ba kane ka la jia ruh ha kine ki khyndiat sngi ba la dep ha kaba ki nonglum bai musur jong ka Hima Nongmynsaw Syiemship katba ki dang leit ban lum ïa ka pisa na ki nongshong ïew na ka Ïew Langpih, ki la shah pynsangeh bad mih ruh ka jingïania kaba jur.
Ka khubor ka ong ruh ba kane ka jingïania ka la jia ruh hadien ba u Bah Hendro Samakha uba long u Chairman ka Raid Mynsaw ryngkat ki katto-katne ngut ki briew kiba dei ki nongbud ne nongkyrshan jong u ki la leit ban pynsangeh noh ïa kitei ki briew jong ka Hima ha kaba la ong ruh ba hadien katei ka jingwan pynsangeh jong katei ka kynhun jong u Bah Hendro Samakha, ka la mih ka jingïapynibor bad ka jingïania kaba jur hynrei ki briew jong ka Hima ki la phet noh khnang ban lait ka jingïasngewsih.
Ka khubor ka ong ruh ba hadien katto-katne ba katei ka jingïania ka la kynjah ki briew jong ka Hima Nongmynsaw Syiemship ki la leit ban lum biang ïa ka bai musur ryngkat ka jingïasynran lang lang ki bor jong ka aiñ phewse ha katei ka kynti ruh ka jingthmu ka la pulom noh namar ka kynhun jong u Bah Hendro Samakha ryngkat bad u ki la wan ban pynsangeh jubor biang kat haduh ba ki bor jong ka aiñ ki la ban wan tuklar bad ban tem ïa katei ka jingjia.
U Bah Phlowel Syiem, Acting Syiem ka Hima Nongmynsaw Syiemship u la ong ba ka Hima ka la leit ban lum halor ka hok bad ka iktiar kaba ka District Council ka la pynkupbor ïa ka Hima ba ka don hok ban lum kum u Syiem hynrei ka jingwan pyni bor jong uwei u ‘riew shimet ka long kaei-kaei kaba ym lah ban pdiang, kumta ka Hima kan leit ai jingthoh noh ha ki bor jong ka District ba kan tuklar ïa kane ka kam.
Na ka liang u Bah Hendro Samakha pat u la ong ba ma u ryngkat ka kynhun da lei-lei kin ym shah ban lum musur namar kam dei ka hok jong ka Hima Nongmynsaw Syiemship hynrei ka dei ka ïew kaba la seng da ka Hima Raidmynsaw hapoh ka jingïalam jong u mynba u dang dei kum u Sirdar.
