Nongpoh, Jylliew 09
Ki ar ngut na kawei ka longïing kiba la shitom jur hadien ka jingbam ïa u tit khlaw ha ka shnong Saiden ha kine ki khyndiat sngi ba la dep ki la khlad noh ha ka jaka sumar ha Bethany Hospital, Nongpoh, na ka jingbanjur jong ka jingshitom.
Kine kiba la khlad noh ki kynthup ïa ka kmie, ka Kong Larita Syiemlieh kaba khlad mynta ka sngi, ka Sngi U Blei bad uwei u heprit, u Da-U-Rijied Syiemlieh (3 snem ka rta), uba dei u khun ksiew jong katei ka longkmie uba la khlad noh ha kine khyndiat sngi ba la dep ha katei ka juh ka jaka ai jingsumar ha Nongpoh.
Kum ban shu kdew hangne, kumba san ngut na kawei ka longïing jong ka dong Nongkyndang ka shnong Saiden ki la kem pang kynsan ha ka miet jong ka 3 tarik u Jylliew 2024 hadien ba la dep bam ja miet ryngkat bad u tit khlaw ha kaba la kit noh ïa ki sha Civil Hospital Nongpoh bad Bethany Hospital Nongpoh na ka bynta ban ïoh ïa ka jingsumar.
