Shillong, Jylliew 09
Ka BJP ka la ïoh bun tam ka bhah ha ka Sorkar Pdeng ba-thymmai ba la ïalam da u Myntri Rangbahduh, u Narendra Modi, katba ki seng kiba ïasynrop lang ha ka lama jong ka Na-tional Democratic Alliance (NDA) ki la ïoh tang katto katne.
Na ki 72 ngut kiba la bam smai ha ka Sngi U Blei, ba kynthup ïa u Modi, 61 ngut ki dei na ka BJP katba 11 ngut ki dei na ki seng synrop kiba don ha ka NDA kum ka Telegu Desam Party (TDP), Janata Dal (United), Janata Dal (Secular), Lok Jan Shakti (Ram Vilas), Shiv Sena, Hindustani Awam Morcha (Secular), Apna Dal (Soneylal), Rashtriya Lok Dal, Republican Party of India (A) nalor kiwei.
Lah ban kdew ba ha ka ilekshon MP kaba dang shu dep shen, ka BJP marwei ka la jop 240 ngut ki MP, bad ka la donkam sa 32 ngut ki MP ban thaw ïa ka sorkar bathymmai. Hynrei ka BJP ka khlem ïakynduh jingeh ban thaw sorkar namar ki don bun tylli ki seng kiba la ïakhun lang ïa ka ilekshon hapoh ka lama jong ka NDA ba la lamkhmat hi da ka BJP.
Ki 72 ngut ki Myntri ki kynthup ïa u Myntri Rangbahduh, 30 ngut ki Myntri ha ka kyrdan Cabinet, 5 ngut ha ka kyrdan Myntri Khynnah (Independent Charge), bad 36 ngut ki Myntri Khynnah.
