Shillong, Jylliew 09
Ka Kong Bindas Syiem kaba la shong shah thngan mynta la saw sngi kynthih ha jaka pynïeng kali hajan Additional Secretariat ka la kren shai ba kan weng ïa ka jingïakhih tang lada u Symbud Myntri Rangbah ka Jylla, Bah Prestone Tynsong ne u Myntri Rangbah ka Jylla, u Conrad K. Sangma ki wan ban ïakynduh ïa ka ha ka jaka ba ka shong shah thngan.
Ka jingshong shah thngan ba khlem buh por jong katei ka longkmie na Umden ka la kynjoh sha ka saw sngi ha ka Sngi U Blei.
“Ka met jong nga kam lei-lei, nga shu tlot…ki doktor ki la wan ban peit ïa nga, ki la peit bniah ïa ka shini, BP bad ka biang, hynrei ki shu ong ba nga duna lyer (Oxygen),” la ong ka Kong Syiem haba kren bad ki lad pathai khubor.
Ka la ong ruh ba wat la ka jingshong shah thngan jong ka, ka la ïaid la kumba 92 kynta eiei, hynrei ym pat shym la don mano-mano ruh kiba wan mih na ka liang ka Sorkar.
Haba kylli, ka la ong, “Nga kwah ban ïakynduh bad ïoh ka jingthoh kaba tikna na u Bah Prestone bad u Myntri Rangbah ka Jylla. Nga kwah ïa u Bah Prestone ne u Myntri Rangbah ban wan ïakynduh ïa nga hangne ban ïakren bad nga.”
Ka la kren shai ruh ba lada kitei ki nongïalam ka Jylla ki kwah ïa ka ban weng noh ïa ka jingïakhih shah thngan, kata ki dei ban wan ïakynduh ïa ka bad lada jia ba kim kwah ruh, kata ka shong ha ki.
Haba jubab, ka la kubur ba ka don eiei sha lyndet haba ïadei bad katei ka liang wat la kam pat kwah ban pynpaw eiei ïa mynta hynrei kan ap shuwa shi sngi ar sngi bad kan sa nang wad bniah halor katei ka bynta.
“Lada kim wan na ki bor ba halor ha kane ka jaka, nga la raikut bad aiti la ka jingim na bynta ka bha ka miat jong ki paidbah bad ban bteng ïa kane ka jingshong shah thngan. Lada ki wan ban ïakren halor kane ka mat, ngan weng ïa ka jingïakhih,” la ong ka Kong Syiem.
Ha ka Sngi Palei katei ka longkmie ka la wan mih kyndit-kynsan hakhmat ka khyrdop Secretariat ban shong thngan bad byrngem ruh ban shong shah jingit ha ban da ïap.
Hynrei tang hadien 15 ne 20 minit eiei ba ka don hakhmat ka khyrdop jong ka Secretariat, la wan noh ki pulit ban pynkynriah ïa ka na katei ka jaka ban leit phah shong pat ha jaka ïeng kali kaba don hajan ka Additional Secretariat.
Kane ka jingwan shong shah thngan jong katei ka longkmie ka long halor ka jingbym shimkhia jong ka Sorkar ban shna pynbha noh ïa ka surok Nongpoh-Umden-Sonapur.
