Khliehriat, Jylliew:
Kan long ka sngi sah jingkynmaw na ka bynta ka Khliehriat Civil Hospital, East Jaiñtia Hills, hadien ba la ïoh ban plie paidbah ïa shibun tylli ki kor mashin bad ki tiar ai jingsumar kiba katkum kane ka juk hapoh kane ka jaka sumar ha ka jingïadon lang u Myntri ka Sorkar Jylla u Bah Kyrmen Shylla bad ka Kong Santa Mary Shylla MLA kum u Kongsan bad Symbud Kongsan.
Kine ki mashin bad ki kor ki bor ba la ïoh ban pyllait ha ka 7 tarik Jylliew ki kynthup ïa ka Modern Laboratory ïa kaba la lah ban pynïoh lyngba ka jingkyrshan pisa ba la pynmih hi da ka Civil Hospital Khliehriat.
La bynrap sa 11 tylli ki mashin kiba katkum kane ka juk na ka bynta kane ka laboratory kaba la pynlong ïa kane ka jaka sumar ba kan ïaryngkat bad kiwei kiwei pat ki hospital kiba don hapoh ka jylla Meghalaya. Kumba ka long mynta la lah ban leh haduh 142 tylli ki test.
Kawei pat ka kor jingsumar ba kongsan ka dei ka Digital X-Ray Machines ïa kaba la pynïoh lyngba ka sienjam ba la shim da ki bor pynïaid district hapoh jong ka CSR jong ka HDFC Foundation, ka Digital X Ray ka dei kawei na ki mashin bathymmai jong kane ka juk ba la pyndonkam ha Meghalaya.
Kumjuh ka Video Endoscopy System la lah ban pynïoh lyngba ka sienjam jong ki bor pynïaid district hapoh ka CSR jong ka HDFC Foundation ka ban ïarap shibun ha kaba ïadei bad ki lad jingsumar ENT hapoh ka district.
Ha kajuh ka por la lah ruh ban pynïoh ïa kawei ka kali Ambulance lyngba ka DMF da ki bor pynïaid district ka ban ïarap ïa ka hospital na ka bynta ban aijingshakri bad pynkit ïa ki nongpang shaduh Shillong bad Guwahati. Kumba ka long mynta ka Khliehriat Civil Hospital ka pynkynriah ïa ki nongpang tang haduh Jowai.
Shuh shuh ïa ka kor Mechanized Washer Extractor la pynïoh lyngba ki bor pynïaid District hapoh jong ka NETC CSR bad kane kan ïarap ïa ka hospital ba kan lah ban pynbha bad tehlakam ha kaba ïadei bad ka jingïabit jingpang.
Katba ïa ka Conference Hall la thaw da ka tnat ka koit ka khiah lyngba ka fund ka jong ki hi.
