Shillong, Jylliew 09
U MLA ka BJP na South Shillong konstitwensi u Bah Sanbor Shullai u la lehkmen ha ryngkat ki nongkyrshan ka BJP ha South Shillong konstitwensi namar ka jingïoh biang u Narendra Modi ban bamsmai kum u Myntri Rangbahduh ka ri ban ïalam ïa ka Sorkar National Democratic Alliance (NDA) ha ka sien balai.
Kum ka jinglehkmen, la sakhi ïa ka jingthang bom bula ha kaba la wan ban sakhi lang da ki nongkyrshan jong u Bah Sanbor nalor ki nongkitkam ka BJP.
U Bah Sanbor u la ai khublei ïa ki nongthep ‘vote’ ka 19-South Shillong konstitwensi kiba la ai ka ‘vote’ jong ki na ka bynta ka kynhun NDA ha ka ilekshon Lok Sabha kaba dang shu dep.
Ka kyrtong jong ka NPP ka Kong Ampareen Lyngdoh kaba la kyrshan lang da ka BJP hapoh ka kynhun NDA, ka la ïoh ïa ka jingjop na South Shillong konstitwensi kaba mihkhmat da u Bah Sanbor kum u MLA ka BJP.
Ha South Shillong konstitwensi, ka NPP ka ïoh 7,701 vote, bud sa ka VPP kaba ïoh 5,201 vote, ka Congress ka ïoh 4,205 vote katba ka UDP ka ïoh 351 vote.
U Bah Sanbor u la ong ba ki nongthep ‘vote’ ka South Shillong ki dei kiba ïohi jngai bad ha kine ki 52 snem ba la ïoh ïa ka Jylla, bun ki jingdawa kim pat urlong bad donkam ban long kiba rangbah ha kaba ïadei bad ka jingshim rai khamtam haba ïadei bad ka rai na ka bynta ka lawei.
Haba ong ba ngim dei ban khang ïa ki kam pynroi tang namar ka jingïoh ‘vote’, u Bah Sanbor u la ong ba u Myntri Rangbahduh ka ri u Narendra Modi ha ka jingkren jong u ruh u la kren shai ba ha kiba bun ki Jylla kiba bun da ki riewlum bad bun ki Khristan ka NDA ka ïoh ban synshar.
“Ki mat kiba don ha ki Jylla kim dei ban shah tyllep noh da ki jingsngew niam bad ym pat ju don kano-kano ka sien ha kaba ki kynhun niam kin shah iehnoh ha ka seng jong ngi,” la ong u Bah Sanbor.
Nalor nangta, u la ong ba u Amit Shah ruh ha ka por ba u wan sha Shillong u la ju ong ïa ki nongtrei ka BJP ban leit sha ki nongïalam balang borabor.
Hynrei kaba sngewsih ka long ba ha ka por ilekshon, ki don shibun ki jingïalam bakla da kaba pynphriang ïa ki dur bad durkhih kiba pynbakla ha kaba kita ki kylla long ki mat kiba kham kongsan bad la pynphriang ban wanrah ka jingduh jingshaniah.
Hynrei u Bah Sanbor u la ong ba ki nongthep ‘vote’ ka South Shillong ki la pyni sa shisien ba ki don sha ka liang jong ka jingkhih ban wan ki kam pynroi.
Shuh shuh u Bah Sanbor u la ai khublei ïa baroh ki nongtrei ka BJP ha ka ri baroh kawei kiba la ïakhun pyrshah ïa ka Liang Pyrshah.
Ha kajuh ka por, u la kitbok ruh ïa ki 2 ngut ki MP ka Jylla bad u kyrmen ba kin lah ban pynurlong ïa ki jingkhmih lynti jong ki paidbah ka Jylla.
U Bah Sanbor u ngeit ruh ba u Myntri Rangbahduh u Narendra Modi un sa lah ban leh katkum ki jingkhmih lynti ki paidbah ka ri bad un peit ruh ïa baroh ki kynhun jaitbynriew khlem kheiñ ïano-ïano.
