Jowai, Jylliew:
U MLA ka Jowai, Bah Wailadmiki Shylla ha ka 7 tarik u la leit jurip ïa ka jaka pynlang bad pynkhuid um (Treatment Plant) jong ka tnad PHE kaba don ha Urkhla Khimusniang, Jowai.
Kane ka jingleit jurip ka dei hadien ka jingud jingnam jong ki nongshong shnong ka Jowai halor ka jingjakhlia jong ka umbam-umdih kaba la tan na ka Wah Myntdu.
Ha ka jingjurip, u MLA u la ïakren bad phylliew jingmut bad ki ophisar kumjuh ki nongtrei jong ka tnad PHE halor ka jinglong-jingman jong ka um-kor bad ha ka jingjurip u MLA u la lap ba ka um-kor kaba pynpoi da ka tnad PHE ka long kaba la khuid bad kaba la biang ban pyndonkam ïa ka.
Katkum ka jingïathuh ki ophisar jong ka tnad PHE, ka jingjakhlia jong ka um-kor ha kine ki sngi ba la dep ka dei na ka jingther jur jong u slap nalor ka jingbret pathar ïa ka khyndew na ka jingshna ïa ka surok By-pass kaba thymmai kaba la ktah ïa ka Wah Myntdu, haduh ba ka um kaba poi ha ka jaka pynlang bad pynkhuid umbam ha Urkhla ka la kylla ktieh.
Ïa u MLA la synran lang da u EE jong ka tnad PHE Electrical, Bah P. Synnah, SDO, Bah K. Challam, ki katto-katne ki nongïalam shnong bad ki nongtrei jong katei ka tnad PHE.
U MLA u la jurip ruh ïa ki kor tan um (Pump) ba pyndonkam ha kaba tan ïa ka umbam bad u la ai jingmut ruh ban pynbha shuh-shuh ïa ki kor ki bor ba pyndonkam ban tan um, da kaba buh noh da kiba thymmai katkum ka juk ba mynta.
Shuh shuh u MLA u la lap ba ka umbam ka la long kaba la biang ban pyndap umbam ïa ki paidbah nalor ka jingdonlang jong ka umbam kaba wan na ka Wah Umngot.
