Shillong, Jylliew 09
Ka Synjuk ki Rangbah Shnong Marmaiñ Circle (SRSMC) ha ka Sngi U Blei ka la leit sha jaka pynïeng kali kaba don hajan Additional Secretariat ban ai ka jingkyrshan ïa ka Kong Bindas Syiem kaba la shong shah thngan ha katei ka jaka mynta la kumba saw sngi.
Ka jingshong shah thngan kaba khlem buh por jong katei ka longkmie kaba na Umden, Ri-Bhoi ha katei ka jaka ka long ban dawa na ka Sorkar ban maramot noh ïa ka surok Nongpoh-Umden-Sonapur namar ka jingjot rathai kaba la neh mynta la bun snem.
“Hadien ba ngi la ïohsngew ïa ka jingwan jong ka Kong Bindas ban shah thngan na bynta ka surok kaba ha ka thaiñ jong ngi, da ka jingsngewkhia, ngi ruh ngi wan ha kane ka por ban ai ka jingkyrshan ïa ka namar naduh ba la shna ïa ka (surok) la 15 snem mynta, kam don kano-kano ka jingpynbha wat la ka la sniew haduh katta-katta,” la ong uwei na ki nongïalam ka SRSMC haba kren sha ki lad pathai khubor.
Ha kajuh ka por, haba pynpaw ïa ka jingeh haba ïadei bad katei ka surok, u la ong ba ki nongshong shnong ki shem jynjar shi kat dei ban leit buh skul ïa ki khynnah kumjuh ïa ki nongpang bad kito kiba leit ïew leit hat haba ki pyndonkam ïa katei ka surok.
Haba kylli, u la ong, “Hooid ka dei shisha, man ka por ba don ka ilekshon, ngi ju ïohsngew ïa kata ka jingkular ban shna noh ïa ka surok na kawei ka por sha kawei pat, ban sdang kam noh…ka jingwan thew ym lah shuh ban ñiew, la bunsien. Hynrei ka shu sahkut noh hadien ba la kut ka ilekshon, kata ka dei kaba ngi lap ngi shem.”
Ha kawei ka liang, u la ong ba kane lehse ka lah ban dei tang ka jingpynbiej paidbah, naba ka long shisha ka jingsangsot na bynta ki nongshong shnong ka thaiñ kiba mad ïa kane ka jingeh.
Haba jubab, u la kubur ba la ju ïohsngew shaphang kita ki jingkular hynrei ym tip satia na kaei ka daw ba ka sahkut sah haduh mynta – lehse ki lah ban dei na ki daw ba kim lah ban batai. “Ngi wan hangne ban kyrshan ïa ka Kong Bindas Syiem namar ngi sngewkhia haduh katta-katta ba ka la lah ban leh kat ïa kane ka kam rangbah,” la ong sa uwei u dkhot ka SRSMC.
Shuh shuh haba bynrap ba ka jingwan shong shah thngan jong ka Kong Syiem mynta ka la dap saw sngi kynthih, u la ong ba ka Sorkar kumjuh u MLA ka thaiñ ki dei ban shimkhia mardor ïa kane ka kam.
