Shillong, Jylliew 09
Ka Congress kaba ju don 5 ngut ki MLA baroh shikatta bad kaba la ithuh kum seng Liang Pyrshah kaba kham hakhmat ha Ïingdorbar Thawaiñ ka Jylla, ka lah ban duh noh ïa kane ka jingithuh ynda u MLA jong ka na Gambegre konstitwensi u Saleng A Sangma un iehnoh kam kum u MLA namar u la shahjied kum u MP bathymmai na Tura Lok Sabha konstitwensi.
Ka jingjop u Saleng ha kawei ka liang ka la long ka jingkmen ïa ka Congress bad ynda la dei ka por ba une u MP un hap ban iehnoh kam kum u MLA kan long ka jingdiaw. Kane ka dei namar ka Congress ka lah ban duh noh ar tylli ki kyrdan kiba ka ïoh ha Ïingdorbar Thawaiñ kita ka kyrdan nongïalam ka Liang Pyrshah lane Leader of Opposition (LO) bad kyrdan Chief Whip (CW) ka Liang Pyrshah.
U Saleng u lah ban phah ïa ka shithi iehnoh kam kum u MLA ha kane ka taïew ban wan bad ka por ban iehnoh kam ka long hapoh 14 sngi naduh ba la shahjied namar ka aiñ kam shah ban bat lang kum u MLA bad kum u MP.
Ïa ka kyrdan nongïalam ka Liang Pyrshah la bat da u MLA ka Congress na Mylliem u Bah Ronnie V Lyngdoh katba ïa ka kyrdan Chief Whip ka Liang Pyrshah la bat hi da u Saleng.
Ynda u Saleng un iehnoh kam kum u MLA, kine ki kyrdan ar tylli kin nym don shuh bad ka Congress namar ka jingdon ki MLA ka Congress kan long noh sa tang 4 ngut ym shuh 5 ngut.
Ïa kine ki kyrdan lah ban ïoh bat noh da ka TMC kaba don 5 ngut ki MLA ha Ïingdorbar Thawaiñ ka Jylla. Ka VPP ka don 4 ngut ki MLA.
Ha u snem ba la dep, u Lamphang ka Ïingdorbar Thawaiñ ka Jylla u Thomas A Sangma u la ai jingithuh ïa ka Congress kum ka seng Liang Pyrshah kaba kham hakhmat wat lada ka don 5 ngut ki MLA mar katjuh kumba don ki MLA ka TMC.
Hynrei ka Congress ka dei ka seng saiñ kaba don bad ithuh ha ka ri India baroh kawei bad ka dei ruh kaba la don slem ha Meghalaya, katba ka TMC ka dei ka seng saiñ pyrthei kaba dang thymmai ha Meghalaya bad kam dei kaba don bad ïoh jingithuh ha baroh kawei ka ri.
