Shillong , Jylliew 09
Ki nongkitkam kiba hakhmat jong ka Voice of the People Party (VPP) Jaiñtia Hills ki don jingkyrmen ba ka jingieid ki paidbah ïa ka VPP kan bteng haduh ka ilekshon MDC bad ha ka ilekshon MLA 2028.
Haba ïakren bad ki nongkitkam ka VPP na Rilum Jaiñtia haba ki wan sha ka jingïalang VPP ha Smit ha ka Sngi Saitjain kiba kynthup ïa ka Kong Deiwi Tongper kaba peit ïa ka Sutnga constituency, Kong Numadeisa Lamare President VPP Women Wing Khliehriat Constituency, Bah Shemborlang Shabong uba dei peit ïa ka Mowkaïaw bad Raliang constituency, West Jaiñtia Hills District ki la pynpaw ba kane ka ‘vote’ kiba ki paidbah ki la thep ha ka VPP mynta ha ka ilekshon MP Lok Sabha kin dang bteng beit haduh ka ilekshon MDC ka ban wan.
Ka Kong Deiwei Tongper ka la ong ba ka VPP ka bym don kyrtong ha ka ilekshon MLA ha u snem 2023 mynta ka la tam da ar hajar vote ïa u Bah Vincent Pala u kyrtong ka Congress ha Sutnga.
Ka la ïathuh ba ka jingjied ki paidbah ïa ka VPP ka dei namar u Bah Vincent Pala um ju sngap ïa ka jingeh jong ki paidbah haba ki mad jingeh bad ïa ka seng NPP lei ki paidbah kim mon shuh.
“Mynshwa haba ym don ba pynsngewthuh haba ai pisa ki paidbah ki shim beit hynrei naduh ba wan pynsngewthuh u Bah Ardent ki paidbah ki la sngewthuh bad hangne ngi donkam ïa ka jingkylla” u la ong.
Ka la pynpaw ka jingsngewkmen ba ki paidbah ki jied ïa ka VPP da kaba pynlut hi ïa ka bam bad bai kali.
Ka Kong Numadeisa Lamare President VPP Women Wing Khliehriat Constituency ka la pynpaw ba kam poi pyrkhat ba ka VPP kan khlaiñ ha Khliehriat haba u Bah Kyrmen Shylla u dei u MLA bad Myntri ha ka Sorkar Jylla hynrei kane baroh ka dei ba ki paidbah kim mon shuh ïa ka seng UDP bad NPP.
“Wat la ngi shah krenbeiñ haba ngi leit ïalap ilekshon hynrei ngi ïaid ryngkat ka jingduwai haduh ba ngin ïoh ïa ka jingjop” ka la ong.
Shuh shuh ka la pynpaw haba ki paidbah ki leit sha ka jingïalang ka VPP long kumba leit jingïaseng namar ki song ja hi bad siew hi bai ka kali.
U Bah Shemborlang Shabong uba peit kyrpang ïa ka Mowkaïaw bad Raliang constituency, u la ïathuh ba ka jingkyrshan ki paidbah ïa ka VPP ka dei namar ka UDP bad NPP ki long kumjuh kiba la synshar ïa ka jylla ym don ka jingkylla. “Ha jingïohi jong nga, ki paidbah ha Raliang constituency kim mon ïa ka NPP hynrei ym don ka seng saiñpyrthei kaba ïohi jngai, na kata ka daw ki jied ïa kiwei ki seng saiñpyrthei hynrei mynta ki ïohi ba dei tang ka VPP kaba lah ban synshar hok ïa ki paidbah” u la ong.
U la ong ba ka jingkren sarong palat kine ki nongïalam na kiwei ki seng saiñpyrthei kiba don ha ka sorkar ka la pynlong ïa ki paidbah ba kin dom hynrei kim pyni da ki nia hynrei ki leh da ki kam. U la ba ka jingkhlaiñ ka VPP ka dei namar ka ju leit pynsngewthuh ïa ki paidbah khlem da kheiñ la ki dei ki shnong kiba rit ne kiba heh. Shuh shuh u la pyntip ba ha Jaiñtia lei ki paidbah ki noh synñiang ïa ka VPP haduh ba kan da khlaiñ ha kane ka ilekshon MP.
