Nongpoh, Jylliew:
Ka Ri Bhoi Youth Federation (RBYF) ha ka Sngi Thohdieng ka la ïoh ban plie paidbah ïa shlem treikam ba pura jong ka seng kaba la shna ha rukom kaba itynnad bad shongkun hapoh ka shnong Saiden, Ri-Bhoi District.
Kane ka jingïoh jong ka seng ïa ka shlem treikam ba pura ka dei hadien 45 snem kynthih jong ka jingshakri ïa ka thaiñ Ri-Bhoi naduh ba la seng nyngkong eh ïa ka ha u snem 1979.
Ïa kane ka shlem treikam ba pura jong ka seng, la wan ban plie paidbah da u Myntri Rangbah barim ka Jylla, u Dr. D.D. Lapang, uba dei uwei na ki nongseng bad nongaibuit jong ka seng ha ka jingïadon ryngkat jong ki 5 ngut ki MLA ka Ri-Bhoi ba kynthup ïa u Bah Mayralborn Syiem, u Bah Charles Marngar, u Bah Sosthenes Sohtun, u Dr. Celestine Lyngdoh bad u Bah Damanbait Lamare.
Ha kane ka sngi la ïadon ryngkat ruh ki nongïalam jong ki seng bapher-bapher ba kynthup naduh u Bah Lambokstarwell Marngar, President ka Khasi Students’ Union (KSU), u Bah Dundee Cliff Khongsit, President ka Federation of Khasi Jaiñtia & Garo People (FKJGP), u Bah Jerson Shylla, President ka Jaiñtia Students Union (JSU), u Bah Sadon Blah, President ka Hynñiewtrep National Youth Front (HNYF), u Bah R.B. Shadap, President ka Ri Bhoi Dorbar, u Bah B.B. Makdoh, President ka Synjuk ki Rangbah Shnong Ri-Bhoi lem bad kiwei-kiwei nalor ki spah ngut ki dkhot jong ka RBYF.
Kum ban shu kdew hangne, ïa ka Ri Bhoi Youth Federation, la suit la shor nyngkong ha ka 7 tarik u bnai Nailur jong u snem 1979 ha ka ïingsah jong u Dr. D.D. Lapang ha kaba la jied ïa u Rev. S.W. Syiem kum u President bad u Bah R.B. Shadap kum u General Secretary ha ka kyrteng Ri Bhoi Dorbar Youth Wing kaba dei ka seng jong ki samla hapoh ka jingïalam jong ka Ri Bhoi Dorbar ban ïakhun pynïoh ïa ka distrik Ri-Bhoi kaba pura.
Dei hadien ka jingleit kynduh jong kitei ki nongïalam ïa u Myntri Rangbah ka Jylla ha katei ka por, u Bah B.B. Lyngdoh (Bam Kwai ha Dwar U Blei), ba utei u Myntri Rangbah, u la ai jingmut ïa ki nongïalam ba kin pynkylla noh na ka Ri Bhoi Dorbar Youth Wing sha ka Ri Bhoi Youth Federation kaba kham don jingmut bad kham shongkun bad kumta la pynskhem ïa katei ka kyrteng RBYF kaba la ai jingmut da u Bah B.B. Lyngdoh ha ka 25 tarik u bnai Nailur, 1979 bad ïaineh haduh mynta mynne.
U Dr. DD Lapang haba kren ha kane ka sngi u la ong ba ka dei ka sngi ka ban sah jingkynmaw ïa ki khun samla jong ka dong Ri-Bhoi bad ai khublei ruh ki nongïalam ba rangbah jong ka seng kiba la lah ban pynurlong ïa kane ka jingangnud jong ki ban don noh ïa la ka jong ka shlem treikam kaba pura bad kaba pyni ruh ïa ka jingkhlaiñ treikam jong kane ka seng kaba ma u, u la ïadon bynta naduh ba la suit la shor ïa ka.
Kiwei de ki nongkren ba kynthup naduh ki MLA bad ki nongïalam sengbhalang, ki pynpaw ka jingsngewkmen bad kitbok kitrwiang ïa ka seng kaba la lah ban plie ïa la ka shlem treikam kaba pura ka ban long ka jaka saiñdur ïa ka lawei jong ki khun samla ka Ri-Bhoi bad ka ban long ruh ka jaka kaba lah ban ïamir jingmut na ka bynta ban peit ïa ki mat ki jura kiba ktah ïa ka jaidbynriew ne kiba ai jingmyntoi kumjuh.
Na ka liang u President ba rangbah jong ka seng, u Bah Bipul Thangkhiew, u la pynpaw ïa ka jingsngewnguh kaba kyrpang sha baroh ki briew kiba la donkti ban noh synñiang na ka bynta ban tei ïa kane ka shlem treikam kaba pura kaba la sdang nyngkong naduh u snem 2004 bad lah pat ban pyndep tad haduh mynta u snem 2024.
Na ka liang utei u nongïalam u la pynpaw ruh ïa ka jingainguh sha U Blei ba dei lyngba ka jingbtin lynti bad ka jingïalam ka jong u ba kum ka seng, ka lah ban pynïeng ïa kane ka shlem treikam kumba ka long mynta.
