Shillong, Jylliew:
Ka Durex, kaba long kawei na ki kyrteng kompani ba paw bha kaba trei radbah na ka bynta ban wanrah ïa ka koit ka khiah ha ka shongkha-shongman, mynta ka sngew sarong ban ïoh pynbna ïa ka jingïatreilang bad ka Outlook Magazine ban pynmih ïa ki jingthoh kiba kyrpang na ka bynta ka Pride Month edition. La saiñdur ïa kane ka sienjam hapoh jong ka Durex’s flagship, The Birds and Bees Talk (TBBT), ïa kane ka sien pynmih jong kane ka Magazine la pynwandur ïa ka ban long kum ka jingrakhe bad ka jingkyrshan ïa ka kynhun jong ka LGBTQIA+, kaba ïahap ruh bad ka phang jong ka jingrakhe ïa ka Pride Month mynta u snem, bad ka phang ka long, ‘Reflect. Empower. Unite.’
Kane ka sien pynmih ïa ka Outlook Magazine ka long kaba kyrpang bad la pynmih ïa ka ryngkat ka jingïatreilang bad ka Durex TBBT, bad kane kam long tang ka kum ka jingpynmih ïa ka Magazine kumba ju long. Ka long kum ka sakhi ïa ka bor jong ka jingïathuh khana, ka jinghikai, bad ka jingkyrshan jong ka imlang sahlang khnang ba ka imlang-sahlang kan long kaba pdiang ïa baroh bad kaba sngewthuh bad shemphang. Da kaba rakhe ïa ka jingjop bad ka jinglah ban sngewthuh shaphang ki jingeh jong ki kynhun ka LGBTQIA+, kane ka sienjam treikam ka pyni shisha ïa ka jingmut jong ka jingrakhe ïa une u bnai ba kyrpang ne Pride Month bad kata ka long ‘Reflect. Empower. Unite.’
Kane ka sienjam treikam ka long kum kawei na ki bynta ba kongsan bha ha kaba ïadei bad ka jingnoh synñiang sha ka imlang-sahlang, da ka jingthmu ban wanrah ïa ka jingpdiang lut ïa baroh bad ban wanrah ïa ka jingïakren kaba kongsan sahphang ka jingkoit jingkhiah ha ka liang ka shongkha-shongman bad ka kha ka pun. La khot sngewbha ban pynbeit ïa ka jingthoh ne Edit da u Ravi Bhatnagar, Director jong ka External Affairs and Partnerships, SOA, Reckitt bad uba long ruh u nongïoh ïa ka khusnam Trans Allyship Award ba la ai da ka National Human Rights Commission (NHRC), kane ka sien pynmih ïa ka Magazine ka don ïa ki khana ba kyrpang bad ba ai mynsiem, ka jingpynsngew na ki riew shemphang, bad ki thup jingthoh kiba ai jinghikai khnang ba kin long kiba ïahap bad ki nongpule bapher bapher.
Ka jingpynkup bor ïa ki sur: Kane ka sien pynmih ïa ka Magazine ka wanrah ïa ka rynsan kaba khlaiñ na ka bynta kito ki briew kiba paw bad kiba hap ha ka kynhun jong ka LGBTQIA+ kum u Sushant Divgikar, Alok Verma, Dutee Chand, bad Trinetra Haldar Gummaraju. Ki khana shaphang kumno ma ki ki ïaleh ïa ki dienpynkiang bad wanrah ïa ka jingsngewthuh ba dei ban pdiang ïa baroh ka long kaba ai mynsiem haduh katta katta bad ka jingthmu ka long ban pynkup bor ïa ki nongpule da kaba pyni sha ki ïa ka jingïaishah bad ka jingjop jong ka kynhun jong ka LGBTQIA+.
Ka jingpynsngew na ki riew shemphang: Ha kane ka magazine la don ïa ki column ba la thoh da ki riew pawkhmat lum u Arun Kumar Mishra, Chairperson ka National Human Rights Commission; Laxmi Narayan Tripathi, kaba long kawei na activist ne ka nongïakhun ha kaba ïadei bad ka hok jong ki Transgender ne kito kiba ithuh ïalade da kumwei pat ym kynthei ne shynrang; bad u Ashok Row Kavi, uba long uwei na ki nongthoh khubor bapaw bha. Kine ki jingthoh ba la noh synñiang da kine ki nongthoh ki long kiba ngam jylliew bha shaduh sha ka tynrai, sha ka hok, bad ka jingïohi ne ka jingpyrkhat jong ka kynhun jong ki LGBTQIA+ ïa ka imlang sahlang, bad ka wanrah ïa ka jingsngewthuh ba kit jingmut kaba long kum ka jinghikai bad kaba pynlong ïa ki briew ban pyrkhat.
Ka jinghikai kaba biang: Ka ban ruh halor ka jingdonkam ban ai jinghikai kaba biang ha kaba ïadei bad ka long shynrang long kynthei, ka jingïada, bad ka jingkynriah noh ha ka rukom jong ki riti dustur, kane ka sien shon ïa kane ka Magazine ka thmu ban pynlong ïa kane ka imlang-sahlang ban long ka imlang-sahlang kaba ïar bad ba burom ïa ki bynta bapher bapher bad pynkup bor ruh ïa ki briew ba kin ïaleh tyngeh ban poi sha ka thong wat lada ki ïathuh ïalade ha kano kano ka rukom. Ki jingthoh ki pyni ïa ka jingpyrshang kiba dang ïaid bad ka jingangnud na ka bynta ka lawei ban pynlong ia kane ka pyrthei kaba pdiang bad kynthup lang ïa baroh, bad pynlong ïa kine ki jingthoh kum ki shlem jingtip na ka bynta ki nongpule kiba kwah ban sngewthuh bad kyrshan ïa ka kynhun jong ka LGBTQIA+.
Ka TBBT Program’s Impact: Ka sienjam treikam jong ka The Birds and Bees Talk ka la lah ban ai ïa ki jinghikai kiba ïadei bad ka jingkoit jingkhiah ha ka kha ka pun bad ka shongkha shongman ha kylleng ka India. Ka prokram Social Return on Investment (SROI) Evaluation Study Report ka pyni ba kumba la ai T.1 na ka bynta T.24.40 sha ka imlang sahlang, kaba pyni ïa ka jingtreikam bha bad ka jinglah ban pyniar ïa ka jingtreikam jong ka. Da kaba kren ïa ki bynta ba kongsan tam bad kyntiew ïa ka jingim ban long kiba koit ba khiah, ka prokram jong ka TBBT ka ïarap ïa ki khynnah samla da kaba wanrah ïa ki jinghikai kiba donkam ha ka jingim, ka akor ka burom, bad ka jinglong jingman kaba don ka jingkit khlieh kum ki samla.
