Shillong, Jylliew 09
Ka Federation of Khasi Jaiñtia and Garo People (FKJGP) Central Body ka dap da ka jingsngewsih kaba khraw halor ka jingkhlad noh ba kyndit jong u Bah Sounder Strong Cajee uba long uwei na ki nongseng bad President ba nyngkong eh jong ka seng naduh ba la pynlong doh pynlong snam ïa ka seng ha ka 4 tarik Naiwieng, 1989.
Kum ban shu kyrtiang dien ba ïa ka Federation of Khasi Jaiñtia and Garo People (FKJGP) la sdang da ka Saiñ Pyrkhat rangbah jong u Bah Sounder (Bam Kwai ha Dwar U Blei) kaba la neh thop haduh mynta. Lada ym dei une u Samla rangbah ha kato ka por mano ban sdang ban wanrah ïa ka iktiar kaba nep tam ha ka jylla kaba la sdang ban pynjah kyrteng noh ïa ki trai shnong Khasi, Jaiñtia & Garo ha ka kyrteng jong ka Jylla Meghalaya.
Nalor nangta, ka seng ka la ong lyngba ka jingtrei borbah met bad mynsiem jong u Bah Sounder, ka FKJGP kaba la suhthied sha baroh ki bynta jong ka Jylla naduh nongkyndong, ki khapsor bad ki jaka sor ruh kumjuh da ka jingthrang bad ka jingangnud ba ka FKJGP kan dei ka seng ka bym ïashah shiliang ïa u Duk – u Suk, u Rit – u Ria hynrei ka seng kaba im sngi ban Saiñdur ïa ka Lawei jong ka Jaitbynriew ban trei ïa ka kam kaba kyntang na ka bynta ka “Mon-lang, ka Bha-lang & ka Myntoi-lang”.
Ka seng ka la ong ruh u Bah Sounder kum u khlieh Nongïalam jong ka FKJGP naduh u snem 1989 u don ka jingkyrmen na ka bynta ka lawei ba phyrnai jong ka Jaitbynriew ha ki mat treikam, ka Nongrim bad ka Kamram jong ka Seng ka ban tei da ka buit ka jing ïa pei – ba ïa ka Lawei, kaba wad Lynti na ka jingkah – dum bad kan don ka jingkyrmen ban Jop ban long Kynrad ha la ka Ri lajong ban shakri ïa la ka jong ka Jaitbynriew. Nalor kiwei pat ki mat jingdawa jong ka FKJGP na ka bynta ban ïada ïa ka Jaitbynriew ka jingïakhih pyrshah ïa ki mynder (Influx Issue) kadei kawei na ki mat ba khmat eh naduh ki snem 1989 ter ter ha kaba la pynlong ïa ki jingïakhih kiba bun jait hapoh ka jingïalam jong i Bah Sounder ha kito ki por kum u President ban khanglad ïa ki mynder ban bat ïa u lakam jong ka Khaïi-Pateng ha kaba ka Autonomous District Councils (ADC) ka la hap ban pyntreikam mardor ïa ka Trading License naduh kitei ki por tad haduh mynta mynne.
Nalor kata, ka seng ka la ong ba ka jingkhlad kyndit noh jong u Bah Sounder, ka la pynnoh mynsiem shi katdei eh ïa ka seng hi baroh kawei namar ym dei satia ba u dei tang u Nongseng bad Nongïalam barim jong ka seng hynrei u dei i Nongaibuit, U Riew shemphang, U Khraw pyrkhat, U Nongïalam u bym ju pyndem, U Nongïalam uba dap da ka Mynsiem ba Shynrang, U Nongïalam u bym kylla jutang, U Nongïalam uba skhem ka Nongrim bad U Païa Khnong uba noh synñiang shikatdei eh ïa ka jaitbynriew bad ïa ka jylla hi baroh kawei ha ki bynta bapher bapher ïa kaba kum ka seng kam lah satia ban ñiewtang ban jer lut hangne ïa ki kam kiba radbah kiba utei u ‘riew rangbah u la leh mynba u dang im ha snieh jong kane ka sla pyrthei.
Shuh shuh ka seng ka tip bad sngewthuh shai ba ka jingkhlad noh jong utei u ‘Riew Rangbah uba long uwei na ki Païa Khnong, ka long ruh ïa ka jingduh kaba khraw ym tang ïa ka ïing ka sem hynrei ïa ka seng, ïa ka jaitbynriew bad ïa ka Jylla hi baroh kawei.
Kumta na ka liang jong ka FKJGP Central Body, ka phah ïa kane ka kyrwoh sngewlem sha ka ïing hi baroh kawei ba u Nongbuh Nongthaw un syrpai syrpud ïa ka Mynsiem b’la mong ba un ai ka jingpyntngen ïa ki kum ka ïing ha kaba kum kane ka por bad ngi duwai ruh ba ka Mynsiem jong u para shakri un ïoh ïa ka jingjahthait kaba bymjukut.
Kane ka long ka kyrwoh na u Bah Dundee Cliff Khongsit, President ka FKJGP.
