Shillong, Jylliew 09
U Bah Followme Haiong uba dei na Borlekha kaba hap ha ri Bangladesh uba la wan sah ha Lamin, Amlarem, West Jaiñtia Hills District, u la ïathuh ba ki Khasi kiba sah ha Bangladesh ki la kmen haba jop u kyrtong ka VPP u Dr. Ricky AJ Syngkon ha kane ka ilekshon MP sha Lok sabha.
Haba ïakren bad u Bah Followme haba u wan sha ka jingïalang ka VPP ha Smit ha ka Sngi Saitjaiñ, u la ïathuh ba mar shu bna ba u Dr. Ricky u la jop ïa ka ilekshon MP, ki Khasi ha Bangladesh ruh ki la ïashad kmen namar ma ki ruh ki kwah ban wanrah ïa ka jingkylla ha ri lajong.
U la ïathuh ba ki paidbah ka Amlarem constituency ki la kyrshan ïa ka VPP ka dei namar ki kwah ïa ka jingkylla.
“Nga ruh nga sah ha Bangladesh tangba mynta nga la wan sah noh sha India namar ka dei ha ri lajong” u la ong.
Nalor nangta, u Bah Followme u la ïathuh ba wat la u la sah sha India, hynrei u dang ïa phone bad ki Khasi ha Bangladesh namar u dang bun ki bahaïing kiba sah sha katei ka ri. Shuh shuh u la ïathuh ba kiwei ki seng ruh ki biang hi, hynrei ki paidbah ki jied noh ïa ka VPP namar ka ïeng ha ka nongrim namar ki la thait ïa kiwei ki seng saiñpyrthei.
U la pynpaw ka jingsngewkmen namar ki paidbah kiba kyrshan ïa ka VPP ki pynlut hi naduh ba ki leit sha ki jingïalang wat shaduh ka jingïalang jingjop ka VPP ha Smit.
