Shillong, Jylliew 09
U Editor ka lad pathai khubor ‘Shillong Mail – U Kyrwoh, Ka Atiar’, Bah Kyrmenlang Uriah u la batai bad pynsngew halor kaei kaba la jia ha ka miet Sngi Saitjaiñ ha jaka shong shah thngan ka Kong Bindas Syiem kaba don ha jaka pynïeng kali hajan Additional Secretariat.
“Nga poi ha kane ka jaka ha ka miet 8 tarik Jylliew, 2024 hadien ka jingïoh pdiang ïa ka ‘phone call’ na ki katto-katne ki nongshong shnong ka Umden kiba la pyntip ïa ka jingwan ki pulit,” la ong u Bah Uriah.
U la ong ruh ba hadien kane, u la mih na ophis ban leit kum u nongthoh khubor sha katei ka jaka bad ha mar ba poi ha katei ka jaka u la ïohi ïa u OC ka thanat Sadar bad kumta u la pyrshang ban leit kylli na u hynrei une u ophisar pulit u la phet noh na katei ka jaka bad pyntip (telephone) pat sha kiba heh.
“Kumta hadien 20-25 minit sa wan poi u SP ka East Khasi Hills, u Rituraj Ravi, bad uba la suba ba u la shoh khawiang. Kumta nga la sngap shuwa tangba ynda nga ïohi ba ki thmu ban leh da ka bor, nga la leit ban kylli bad ki la ïathuh ba yn rah leit ai jingsumar (ïa ka Kong Bindas),” u la ong.
U Bah Uriah mar kumta u la buh jingkylli ba shaei ka syrnot ‘Medical Certificate’ bad shano ki thmu ban rah ïa katei ka longkmie haba kim lah ban ai ïa ka syrnot ne ban ai kano-kano ka jubab.
Haba pynsngew ba dei ha kane ka khyllipmat ba la mih ka jingïatai nia ha kaba u la buh bun ki jingkylli ïa u SP uba khlem lah jubab, utei u nongthoh khubor u la ong, “Ka jingïeng jong nga ka dei ha ka nongrim ba ki pulit kim lah ban shu kit ïa ka briew khlem da don ka ‘Medical Certificate’, sa kawei ka dei ka jingwan dier por – kata ruh khlem ka jingdon ki doktor, ki majistor namar haba uta u ophisar u la shoh khawiang, hato lah mo ban shaniah ba kaei ka ban jia ïa kane ka longkmie?.”
Shuh shuh u la pynkynmaw ba dang shen u la ïakynduh ïa ka DGP ka Jylla, Kong Idashisha Nongrang ban ong ba kum ki lad pathai, ki thrang ban ïatreilang bad ki pulit hynrei lyngba kane ka jingleh jong ki, kumno yn lah ban shaniah ïa ki.
“Nga ngeit ka DGP kan shimkhia ïa kane ka kam bad kaei kaba jia. Sa kawei ruh nga kwah ban pynsngew ba ha ka synshar paidbah, kam bha ban ïalehkai bad u paidbah,” u la ong.
