Shillong, Jylliew 10
U Symbud Myntri Rangbah ka Jylla, u Bah Prestone Tynsong u la kyrpad ïa ka Kong Bindas Syiem ban weng noh ïa ka jingïakhih da ka jingshah thngan bad u la pynshai ruh ha kaba ïadei bad ki sienjam kiba ka Sorkar Jylla ka la shim na ka bynta ban ïoh ïa ka pisa ban shna kham pynheh ïa kane ka surok Nongpoh-Umden- Sonapur.
Haba kren sha ki lad pathai khubor ha ka Lah Sngi U Blei, u Bah Prestone u la batai shaphang ka jingshim-khia ka Sorkar naduh u snem 2018-2019 ban ïoh pynrung hapoh ka skhim jong ka World Bank hynrei namar bym dap ka pisa kaba long T.1000 klur na ka bynta ka ‘Road Sector,’ la hap ban phah noh ka jingtyrwa sha ka tnat DONER jong ka Sorkar Pdeng.
Kumta u la ïathuh ba dei ha u Lber mynta u snem ba la pynrung ïa kane ha ka thup kaba hakhmat duh (priority list) jong ka tnat DONER, hynrei namarba wan noh ka ilekshon MP, bad treikam ka Model Code of Conduct (MCC), ki kam ki la sahteng shwa. Kumta u la ïathuh ba ha ka taïew ban wan, yn phah ïa ka DPR sha ka tnat Planning bad hadien kata sha ka NEC ka ban sa pynpoi ïa ka DPR sha ka tnat DONER ha Delhi.
U la ong ba ka jingmang pisa kan kot kumba T.51 klur na Nongpoh sha Umden.
Shuh shuh u Bah Prestone u la ïathuh ruh ba ka bynta ka ba-ar jong kane ka surok ka dei na Umden sha Lum Nongrim bad kan leit ïasoh sha Sonapur bad ruh kan ïasoh bad ka surokbah ha Byrnihat.
U la ong ba ka bynta jong kane ka surok kumba 38 ne 39 KM la pynrung lyngba ka PMGSY-III bad ha ka taïew ban wan, kan don ka jingïakynduh ha Delhi ban pynbeit khatduh ïa ka DPR na ka bynta kane.
U la ong ba kane ruh kan poi kumba T.50 klur bad lada kheiñlang baroh ar tylli, kan poi palat T.100 klur.
Kumta u Bah Prestone u kyrpad ïa ka Kong Bindas Syiem ban weng noh ïa kane ka jingshah thngan namar ym dei ba ka Sorkar ka khlem leh ei ei hynrei ka Sorkar ka la shim ki sienjam ban pynurlong ïa kane. “Lada dei pynban ba ngim leh ei ei ka lah ban long da kumwei, hynrei ka Sorkar Jylla ka la shim ïa ki sienjam ban ïoh ïa ka jingmang pisa na ka bynta kane ka surok kaba donkam,” la ong u Bah Prestone.
U la kyrpad ruh ïa ka Kong Bindas ban shim ïa kane ka jingbatai bad jingïathuh jong u ha kaba ïadei bad kane ka surok kum ka jingbatai kaba long tikna (official) namar la ïathuh katkum ba ka long kane ka projek haduh mynta.
Haba kylli, u Bah Prestone u la ong ba lada ong ban leh noh mynta mynta ka dei ka bym lah long namar ym lah ban leh noh mynta namar ki kyndon bad ki rukom kiba hap ban ïaid bad bud katkum ki rukom treikam.
U Bah Prestone u la kyntu biang ïa ka Kong Bindas ban weng noh ïa kane ka jingshah thngan bad u long uba kloi ban ïakynduh lada dang don ka jingbymshai.
